ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐅᖃᐅᓯᕆᔭᖓᓂᒃ ᐱᔾᔪᑎᖃᕐᓗᑎᒃ ᓄᓇᖃᖅᑳᖅᑐᑦ ᓄᑕᖅᑲᑦ ᖃᓄᐃᙱᑦᑐᓐᓇᕐᓂᖏᓐᓂᒃ


ᒪᐃ 5, 2016 (ᑐᕌᓐᑐ) − 11−ᖑᔪᑦ ᐃᓚᒋᔭᐅᔪᑦ ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ (CCCYA) ᐅᖃᓪᓚᒃᖢᑎᒃ ᐃᑲᔪᕐᖢᒍ ᑲᓇᑕᒥᐅᓄᑦ ᐃᓱᒪᓕᕆᔩᑦ ᑲᑐᔾᔨᖃᑎᒌᑦ (CMHA) 65−ᖓᓂ ᐊᕐᕌᒍᑕᒫᑦ ᐃᓱᒪᓕᕆᓂᕐᒥ ᐱᓇᓱᐊᕈᓯᖓᓂ (ᒪᐃ 2-ᒥ 8-ᒧᑦ, 2016).

ᐃᓚᒋᔭᐅᔪᑦ ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐃᓕᓴᖅᓯᓪᓗᑎᒃ ᓴᙱᓂᖓᓂᒃ ᓴᐱᓕᓱᐃᑦᑑᓂᕐᓗ ᑖᒃᑯᐊ ᓄᑕᖅᑲᑦ ᒪᒃᑯᒃᑐᓪᓗ ᓄᓇᓕᓕᒫᒥ ᑕᐅᑐᒃᑐᓄᑦ ᐃᓱᒪᓕᕆᓂᕐᓄᑦ ᐊᒃᓱᕈᕐᓇᖅᑐᓂᒃ. ᑐᓴᕐᕕᒋᖃᑦᑕᖅᑕᕗᑦ ᖃᐅᑕᒫᑦ ᖃᐅᔨᒪᓪᓗᑕᓗ ᐊᒃᓱᕈᕐᓇᖅᑐᒃᑰᖃᑦᑕᕐᓂᖏᓐᓂᒃ ᐅᐸᒃᑕᖏᓐᓂ.

ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐃᓕᓴᖅᓯᔪᖅ ᐱᕈᖅᐸᓪᓕᐊᔪᒥᒃ ᑭᒃᑯᑐᐃᓐᓇᑦ ᐅᔾᔨᕈᓱᓕᕐᓂᖏᓐᓂᒃ ᐃᓱᒫᓗᒃᖢᑎᒃᓗ ᐱᓪᓗᒍ ᐃᓱᒪᓕᕆᓂᖅ ᑲᓇᑕᐅᑉ ᓄᑕᖅᑲᖏᓐᓂᒃ ᒪᒃᑯᒃᑐᖏᓐᓂᒃᓗ. ᑖᓐᓇ ᐃᓱᒫᓘᑎ ᓯᕗᒻᒧᐊᒃᑎᑦᑎᓯᒪᔪᖅ ᐱᕙᓪᓕᐊᑎᓪᓗᖑ ᒐᕙᒪᑐᖃᒃᑯᑦ ᐅᓄᖅᑐᓂᒃᓗ ᓄᓇᓕᕐᔪᐊᓂ ᐊᕕᒃᑐᖅᓯᒪᓂᐅᔪᓂ ᓄᓇᓕᕋᓛᖑᓂᖅᓴᓂᒃᓗ ᖃᓄᐃᓕᐅᕈᑎᒧᑦ ᐱᕙᒌᔭᐅᑎᓂᒃ, ᒪᓕᒋᐊᖃᖅᑐᓂᑦ ᐊᑐᐊᒐᓂᒃᓗ ᐱᐅᓯᒋᐊᕐᓗᒍ ᐃᓱᒪᓕᕆᓂᖅ ᓄᑕᖅᑲᑦᑎᓐᓄᑦ ᒪᒃᑯᒃᑐᖁᑎᑦᑎᓐᓄᓪᓗ. ᓱᓕ, ᑕᑯᒃᓴᐅᑎᑦᑎᖁᔨᙱᓐᓃᑦ ᑖᒃᑯᓂᖓ ᐅᓄᖅᑐᓂᒃ ᒪᓕᒋᐊᓕᖕᓂᑦ, ᐱᕙᒌᔭᐅᑎᓂᑦ, ᐊᑐᓕᖅᑎᑦᑎᔾᔪᑎᓂᒃᓗ, ᐅᓄᖅᑐᑦ ᓄᑕᖅᑲᑦ ᒪᒃᑯᒃᑐᓪᓗ ᐱᖃᑦᑕᙱᑦᑐᑦ ᐃᓱᒪᓕᕆᔭᐅᓂᕐᓂ ᐱᔭᕆᐊᖃᖅᑕᖏᓐᓂ.

ᑐᓴᕐᕕᒋᖃᑦᑕᖅᑕᕗᑦ ᑕᐃᑲᙵᑦᑎᐊᖅ ᓄᑕᖅᑲᓂᑦ ᒪᒃᑯᒃᑐᓂᒃᓗ ᖃᑕᙳᑎᖏᓐᓂᒃᓗ ᐊᔪᕐᓇᕐᓂᖏᓐᓂ ᑐᓗᕈᑎᖃᖃᑦᑕᕐᓂᕐᓗ ᐃᑲᔪᖅᑕᐅᓇᓱᒃᓗᓂ. ᐅᓄᖅᑐᑦ ᖃᐅᔨᒪᙱᑐᐃᓐᓇᖅᑐᑦ ᓇᒧᙵᕆᐊᒃᓴᖅ ᐃᑲᔪᖅᑕᐅᓇᓱᒃᓗᓂ. ᐃᓚᖏᓐᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᓇᓂ ᓄᓇᖃᕐᕕᖏᓐᓂ, ᐱᔨᑦᑎᕋᐅᑏᑦ ᐊᑐᐃᓐᓇᐅᙱᒻᒪᑕ. ᐊᓯᖏᓐᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ, ᖃᐅᔨᓴᕐᓃᑦ ᐃᓚᖏᓪᓗ ᖃᓱᓴᐃᔾᔪᑎᓄᑦ ᐱᕕᒃᓴᑦ ᐊᑐᐃᓐᓇᐅᙱᒻᒪᑕ ᓄᓇᓕᖏᓐᓂ, ᐱᑎᑦᑎᓪᓗᑎᒃ ᓄᑕᖅᑲᓂᒃ ᒪᒃᑯᒃᑐᓂᒃᓗ ᐊᐅᓪᓚᖅᑎᑦᑎᓂᕐᓂ ᖃᑕᙵᑎᙱᓐᓃᑦᑐᓐᓃᕐᖢᑎᒃ ᐊᖏᕐᕋᖏᓐᓂᒃᓗ ᓄᓴᓕᖏᓐᓂ ᐱᔭᖅᑐᕐᖢᑎᒃ ᐱᔭᕆᐊᖃᖅᑕᖏᓐᓂ ᒪᒥᓴᕐᓂᕐᓂ, ᐱᐅᔪᓐᓃᖅᑎᑦᑎᑲᓐᓂᕐᓗᑎᒃᓘᓐᓃᑦ ᐃᓱᒪᖏᑕ ᐊᑲᐅᙱᓕᐅᕈᑎᖏᓐᓂᒃ. ᐅᓄᖅᑐᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ, ᐅᑕᖅᑭᓐᓇᐃᑦ ᐱᔨᑦᑎᕋᖅᑕᐅᓂᕐᒧᑦ ᑕᖅᑭᒐᓴᐅᔪᓐᓇᖅᑐᑦ ᐊᒻᒪᓘᓐᓃᑦ ᐊᕐᕌᒍᒐᓴᐅᔪᓐᓇᖅᑐᑦ ᐱᕕᖓ ᓄᑕᕋᐅᑉ ᒪᒃᑯᒃᑑᓪᓘᓐᓃᑦ ᖃᓄᐃᓕᖓᓂᖓᓂᒃ ᒪᒥᓴᖅᑕᐅᙲᓐᓇᕐᓗᓂ ᐱᓗᐊᒃᑲᓐᓂᕐᓗᓂᓘᓐᓃᑦ. ᐅᓄᒻᒪᕿᒃᑐᓂ ᓄᓇᓕᐅᔪᓂᑦ, ᑲᑎᒍᑎᖃᕐᕕᖃᙱᑦᑐᖅ ᐊᑯᓐᓂᖏᓐᓂ ᐱᔨᑦᑎᕋᐅᑎᑦ ᒪᒃᑯᒃᑐᓄᑦ ᐃᓐᓇᕐᓄᓪᓗ ᒪᒃᑯᒃᑐᑦ ᑲᑕᒃᐸᓪᓕᐊᓗᑎᒃ ᓱᕋᒃᓯᒪᔪᒃᑯᑦ ᐱᙱᓪᓗᑎᒃᓗ ᐱᔨᑦᑎᕋᐅᑎᓂᑦ ᐱᔭᕆᐊᖃᖅᑕᖏᓐᓂ ᑎᑭᐅᑎᓗᒍ ᐅᑭᐅᖅᑯᖅᑐᓗᐊᓕᕐᓂᕐᒧᑦ. ᐱᔨᑦᑎᖃᐅᑎᑦ ᐊᔪᕐᓇᒐᔪᒃᑐᑦ ᕿᓂᖅᓴᕆᐊᒃᓴᖅ ᐱᑕᖃᙱᓗᐊᕐᖢᓂᓗ ᐊᐅᓚᑦᑎᓂᕐᓂ ᐱᔨᑦᑎᕋᐅᑎᓄᑦ ᐊᒻᒪ ᐱᔨᑦᑎᕋᖅᑎᓄᑦ.

ᐃᓚᖏᑦ ᐱᔭᐅᔭᕆᐊᓛᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑲᓇᑕᒥ ᐊᒃᑐᖅᑕᐅᓛᖑᔪᑦ. ᐅᓄᖅᑐᑦ ᓄᑕᖅᑲᑦ ᒐᕙᒪᒃᑯᓐᓄᑦ ᑲᒪᒋᔭᑦ ᐊᑐᖃᑦᑕᖅᑐᑦ ᓇᐅᒃᑯᑐᐃᓐᓈᕐᓇᖅᑐᒃᑯᑦ, ᐊᒃᓱᕈᕐᓇᖅᑐᒃᑯᑦ ᐱᓕᕆᐊᖑᙱᑦᑐᒃᑯᓪᓗ ᐃᓱᒪᓕᕆᓂᕐᓂ ᐱᔭᕆᐊᓕᖕᓂ. ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, ᐅᖁᒪᐃᑦᑐᒃᑰᖅᑐᓄᑦ ᑭᒡᒐᖅᑐᖅᑕᐅᔪᑦ ᓄᑕᕋᓕᕆᔾᔪᑎᓂᑦ ᐊᑐᖃᑦᑕᖅᑐᓂ, ᐅᖁᒪᐃᓐᓇᖅᑐᒃᑯᑦᑕᐅᖅ ᐊᒃᑐᖅᑕᐅᔪᑦ ᑐᓗᕈᑎᓄᑦ ᐱᔨᑦᑎᕋᐅᑎᓄᑦ ᐊᔪᕐᓇᖅᑐᒃᑯᓪᓗ ᐱᓇᓱᒃᓗᓂ ᐱᔭᕆᐊᓕᖕᓂᑦ ᐱᓕᕆᐊᒃᓴᓂᑦ, ᐅᓄᖅᑐᑦ ᐃᓂᖃᕐᒪᑕ ᐅᑭᐅᖅᑕᖅᑐᒥ ᓄᓇᓕᕋᓛᖑᔪᓂᒃᓗ ᐊᑐᖃᑦᑕᖅᑐᑦ ᐱᒻᒪᕆᐅᓛᓂᑦ ᐱᔨᑦᑎᕋᕐᑕᐅᕝᕕᖃᙱᓐᓂᕐᓂ.

ᐊᑕᑎᑕᖅ ᖃᓄᐃᓕᐅᖃᑦᑕᖅᓯᒪᓂᕐᓂ ᐃᓗᓕᖃᖅᑐᖅ ᑐᑭᓕᐅᕈᑎᓂᒃ ᐱᑎᑕᐅᔪᓂᒃ ᑲᑎᒪᔨᓂᑦ ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓂᑦ, ᓇᓗᓇᐃᖅᓯᓪᓗᑎᒃ ᐊᑐᖃᑦᑕᖅᓯᒪᔭᖏᓐᓂ ᓄᑕᖅᑲᑦ ᒪᒃᑯᒃᑐᓪᓗ ᑲᓇᑕᓕᒫᒥ ᐱᓇᓱᖕᓂᕐᓂ ᐃᓱᒪᓕᕆᔨᑦ ᐱᔨᑦᑎᕋᐅᑎᖏᓐᓂ.

ᐊᑐᖃᑦᑕᖅᓯᒪᔭᖏᑦ ᓄᑕᖅᑲᑦ ᒪᒃᑯᒃᑐᓪᓗ ᐃᓅᔪᓐᓄᑦ ᐃᓱᒪᒥᒍᑦ ᐱᔾᔪᑎᖃᕐᖢᑎᒃ, ᐲᖅᑕᐅᖃᒻᒥᕐᖢᓂ ᓱᓕᕗᖔᕈᑎᐅᓚᐅᖅᑐᓂ ᐃᓂᒋᔭᖏᓐᓂᒃᓗ ᑎᑎᖅᑲᓂᑦ ᒐᕙᒪᑦᑎᓐᓂ. ᐅᔾᔨᕈᓱᒃᐸᓪᓕᐊᒐᓗᐊᖅᑎᓪᓗᒋᑦ ᑐᑭᓯᐊᓂᕐᓗ ᐱᒻᒪᕆᐅᓂᖓᓂᒃ ᐱᐅᔪᒥᒃ ᐃᓱᒪᓕᕆᓂᖅ ᑭᔨᒍᓲᑎᓂᒃᓗ ᐱᓕᕆᐊᖑᙱᑦᑐᓂᒃ ᐃᓱᒪᓕᕆᓂᕐᒧᑦ ᐊᑲᐅᙱᓕᐅᕈᑎᓂᑦ, ᐅᓄᖅᑐᑦ ᓄᑕᖅᑲᑦ ᒪᒃᑯᒃᑐᓪᓗ ᐱᙱᒻᒪᑕ ᐱᔨᑦᑎᕋᐅᑎᓂᑦ ᐱᔭᕆᐊᖃᖅᑕᖏᓐᓂ.

ᐊᐅᓚᑦᑎᖃᑎᒌᒐᓱᖕᓂᖅ ᖃᓄᐃᓕᐅᕆᐊᒻᒪᕆᖕᓂᕐᓗ ᐱᔭᕆᐊᓕᒃ ᐱᖁᓪᓗᒍ ᐱᔭᕆᐊᓕᑦ ᐱᔨᑦᑎᕋᐅᑎᑦ ᐃᓂᖏᓐᓃᓪᓗᑎᒃ, ᒪᓂᕋᕐᒥ ᓄᓇᓕᖕᓂᑦ−ᖁᕝᕙᕆᐊᕐᑎᓪᓗᒍ ᐃᓱᒪᓕᕆᓂᖅ ᖃᓄᐃᙱᑦᑎᐊᖅᑐᓕᕆᓂᕐᓗ, ᐋᖅᑭᒍᑎᒃᓴᖅᓯᐅᖅᐸᒌᕐᓂᖅ, ᓈᒻᒪᒃᑐᒃᑯᑦ ᖃᐅᔨᓴᕐᓂᖅ, ᐃᓕᖅᑯᓯᒃᑯᑦ ᓈᒻᒪᒃᑐᓄᑦ ᐱᔨᑦᑎᕋᐅᑎᑦ ᐱᔪᓐᓇᕐᓂᕐᓗ ᐱᔭᕆᐊᒃᓴᖅ ᐱᔨᑦᑎᕋᐅᑎᓂᑦ ᖃᓂᑦᑐᓄᑦ ᐊᖏᕐᕋᒧᑦ ᓄᓇᓕᖕᒧᓪᓗ ᐱᔭᕆᐊᖃᖅᑐᑦ. ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐱᖁᔨᓪᓗᑎᒃ ᒐᕙᒪᑐᖃᒃᑯᓐᓂ, ᓄᓇᓕᕐᔪᐊᓂ ᐊᕕᒃᑐᖅᓯᒪᓂᐅᔪᓂ ᓄᓇᓕᕋᓛᖑᓂᖅᓴᓂᒃᓗ ᒐᕙᒪᓂᑦ ᐱᓕᕆᖃᑎᒌᖁᓪᓗᒋᑦ ᒪᑐᖁᓪᓗᒍ ᐊᔾᔨᒌᒃᑎᑦᑎᙱᓐᓂᖅ ᐊᑯᓐᓂᖏᓐᓂ ᓱᓕᕗᖔᕈᑎᐅᓚᐅᖅᑐᓂᑦ ᐱᓪᓚᑦᑖᖑᔪᓂᒃᓗ. ᑲᓇᑕᒥᐅᑦ ᓄᑕᖅᑲᑦ ᐱᖃᑦᑕᕆᐊᖃᖅᑐᑦ ᖁᕕᐊᓱᖕᓂᕐᒥᒃ ᖃᓄᐃᙱᑦᑎᐊᕐᓂᕐᒥᒃᓗ.

ᓄᑕᖅᑲᑦ ᒪᒃᑯᒃᑐᓪᓗ ᐃᓱᒪᓕᕆᓂᖅ ᑲᓇᑕᒥ:

ᐃᓱᒪᓕᕆᓂᕐᒧᑦ ᐊᑲᐃᓪᓕᐅᕈᑎᑦ ᐊᒃᑐᐃᔪᑦ ᓇᓚᐅᑦᑖᖅᑕᓂ ᖁᓕᓂᑦ ᐊᕙᑎᓄᑦ ᐳᓴᓐᑎᓂᒃ ᑲᓇᑕᒥᐅᑦ ᒪᒃᑯᒃᑐᖏᓐᓂ. ᑲᓚᓇᕐᔪᐊᖅᑐᒥᒃ 3.2 ᒥᓕᐊᓐ ᒪᒃᑯᒃᑐᑦ ᐅᑭᐅᓖᑦ 12-ᓂ 19−ᒧᑦ ᑲᓇᑕᒥ ᐊᑦᑕᕐᓇᖅᑐᒦᑦᑐᑦ ᓂᑲᓪᓗᓕᕐᓂᕐᒧᑦ ᐊᒻᒪ ᑕᓪᓕᒪᑦ ᐳᓴᓐᑎ ᐊᖑᑎᑦ ᒪᒃᑯᒃᑐᑦ 12 ᐳᓴᓐᑎᓪᓗ ᐊᕐᓇᐃᑦ ᒪᒃᑯᒃᑐᑦ ᐊᑐᖅᓯᒪᔪᑦ ᓂᑲᓪᓗᖓᕐᔪᐊᕐᓇᖅᑐᒃᑰᕐᓂᕐᓂ. ᐃᖕᒥᓃᕐᓂᖅ ᐃᓚᒋᔭᐅᔪᖅ ᓯᕗᓕᖅᑐᓂ ᐱᔾᔪᑕᐅᔪᓂ ᐃᓅᔪᓐᓃᕐᓂᕐᓂ 15-ᒥ 24−ᓄᑦ ᐅᑭᐅᓕᖕᓄᑦ ᑲᓇᑕᒥᐅᓄᑦ, ᐱᖃᑖᖑᓪᓗᓂ ᐱᕈᔪᒃᑐᓄᑐᐊᖅ. ᑲᓇᑕᐅᑉ ᒪᒃᑯᒃᑐᑦ ᐃᖕᒥᓃᖅᑐᑦ ᖃᔅᓯᐅᓂᖏᑦ ᐱᖓᔪᒋᔭᐅᔪᖅ ᖁᑦᑎᓛᖅ ᓄᓇᕐᔪᐊᒥ. ᓱᓕᒃᑲᓐᓂᖅ, ᐅᓄᖅᑐᑦ ᐃᓱᒪᓕᕆᓂᕐᒧᑦ ᐊᑲᐅᙱᓕᐅᕈᑎᑦ ᓴᖅᑭᓲᑦ ᓄᑕᕋᐅᓂᕐᓂ ᐃᓐᓇᕈᖅᐊᓪᓕᐊᔪᓂᒃᓗ; ᑎᑭᖦᖢᒍ 70 ᐳᓴᓐᑎ ᒪᒃᑯᒃᑐᑦ ᐃᓐᓇᕈᖅᑐᓂ ᐃᓅᔪᓂᑦ ᐃᓱᒪᒥᖑᑦ ᐊᑲᐅᙱᓕᐅᕈᑎᓕᖕᓂ ᐅᖃᖃᑦᑕᖅᑐᑦ ᖃᐅᔨᒪᔾᔪᑎᖏᑦ ᐱᒋᐊᖃᑦᑕᖅᑐᑦ ᓄᑕᕋᐅᓂᖏᓐᓂ.I

ᐃᓱᒪᓕᕆᓂᕐᒧᑦ ᐃᔾᔪᑎᑦ ᓴᖅᑭᑎᑦᑎᔪᑦ ᑲᔪᓰᓐᓇᖅᑐᓂᒃ, ᐃᓱᒪᓕᕆᓂᕐᒧᑦ ᐊᑲᐅᙱᓕᐅᕈᑎᓂᑦ ᐱᓗᐊᓕᖅᑐᓄᑦ ᐃᓱᒪᐅᑉ ᐋᓐᓂᐊᕐᓂᖏᓐᓂ. ᐃᓱᒪᐅᑉ ᐋᓐᓂᐊᕐᓂᖓ ᐃᓱᒪᑦᑎᐊᕈᓐᓇᙱᓐᓂᕐᓘᓐᓃᑦ ᐅᓚᕕᑎᑦᑎᔪᓐᓇᖅᑐᖅ ᓄᑕᕋᕐᒧᑦ ᒪᒃᑯᒃᑑᓪᓘᓐᓃᑦ ᓈᒻᒪᒍᑎᖓᓂᒃ ᐱᕈᖅᐸᓪᓕᐊᓗᓂ ᐊᒃᑐᐃᓗᓂ ᑖᔅᓱᒪ ᐊᑐᕐᓂᑯᖏᓐᓂ ᐃᓕᓐᓂᐊᕐᕕᖕᒥ, ᖃᓂᒋᔭᖃᕐᓂᕐᓂ ᐊᓯᖏᓐᓂᑦ ᐃᓚᐅᓗᑎᒃ ᖃᑕᙳᑎᖏᓐᓂ ᐱᖃᓐᓇᕆᔭᖏᓐᓂᒃᓗ, ᐱᔪᓐᓇᕐᓂᕐᓗ ᐱᕈᑦᑎᐊᕌᓂᒍᑎᓂᑦ. ᐱᑕᖃᙱᑉᐸᑦ ᐊᑑᑎᓕᒃ ᐋᖅᑭᒐᓱᒃᐸᒌᖕᓂᕐᓂ, ᐃᓱᒪᒧᑦ ᐱᔾᔪᑎᑦ ᓄᑕᕋᐅᓗᓂ ᐃᓐᓇᕈᓕᓵᕐᓗᓂᓗ ᐊᑯᓂᐅᔪᒃᑯᑦ ᐊᒃᑑᑎᔪᓐᓇᖅᑐᑦ ᑎᑭᐅᑎᓗᑎᒃ ᐅᖓᑖᓄᑦ ᐃᓅᑉ, ᐊᒃᑐᐃᓗᑎᒃ ᖃᑕᙳᑎᖏᓐᓂ ᓄᓇᓕᖏᓐᓂᒃᓗ.

ᑲᒪᔾᔪᑕᐅᓇᓱᒃᑐᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓱᒪᒥᒍᑦ ᓈᒻᒪᖏᓕᐅᕈᑎᔪᓄᑦ ᖁᕝᕙᕆᐊᖅᑎᑦᑎᓂᕐᓗ ᐃᓱᒪᓕᕆᓂᕐᒥ ᖃᓄᐃᙱᑦᑎᐊᖅᑐᓕᕆᓂᕐᓂ ᓄᑕᖅᑲᓂᑦ ᒪᒃᑯᒃᑐᓂᒃᓗ ᐱᔭᕿᐊᖃᒻᒪᕆᒃᖢᓂ ᐱᒻᒪᕆᐅᔪᖅ. ᐱᑎᑦᑎᑕᐃᓕᓂᖅ ᐊᑐᕐᓗᒍ ᐃᓱᒪᓕᕆᓂᕐᓂ ᖁᕝᕙᕆᐊᖅᑎᑦᑎᓂᖅ, ᐋᖅᑭᒃᓯᓇᓱᒃᓵᓕᓂᖅᓗ ᐱᓕᕆᐊᕆᓗᒍ ᐋᖅᑭᒃᓯᒪᓂᐅᑲᐅᑎᒋᓂᖅ ᐃᓱᒪᓕᕆᓂᒃᑯᑦ ᐊᑲᐅᙱᓕᐅᕈᑎᓂᑦ, ᐱᔭᕆᐊᖃᒻᒪᕆᒃᑐᑦ ᐃᐅᓯᒋᐊᕐᓗᒍ ᐃᓱᒪᓕᕆᓂᖅ ᒪᒃᑯᒃᑐᓂᑦ. ᐱᐅᔪᖅ ᐃᓱᒪᓕᕆᓂᕐᒥ ᐃᑲᔪᖅᑐᖅ ᒪᒃᑯᒃᑐᓂᑦ ᑎᑎᕋᕐᓗᑎᒃ ᑲᔪᓯᑦᑎᐊᖅᑐᒥᒃ ᐱᓕᕆᐊᒥᑦ ᐊᓯᔾᔨᖅᑐᒃᑯᑦ ᓄᑕᕋᐅᓂᕐᓂ ᐃᓐᓇᕈᓕᕐᓂᕐᓄᑦ, ᐊᑐᕐᓗᑎᒃ ᐊᒃᓱᕈᕐᓇᖅᑐᓂᑦ ᐃᓐᓇᕈᓕᕐᓂᕐᓂ ᐋᖅᑭᒃᓯᓪᓗᓂᓗ ᑐᙵᕕᑦᑎᐊᕙᖕᓂᑦ ᐃᓅᓯᕐᒧᑦ. ᖃᐅᔨᓴᕋᐃᓐᓂᖅ ᐃᓱᒪᒃᑯᑦ ᐊᑲᐅᙱᓕᐅᕈᑎᓂᑦ ᐃᑲᔪᕐᓂᕐᓗ ᓴᙱᓂᖃᖅᑎᑦᑎᔪᓐᓇᖅᑐᖅ ᓄᑕᖅᑲᓂᒃ ᒪᒃᑯᒃᑐᓂᒃᓗ ᐃᓚᒋᐊᕐᓗᖏᑦ ᑕᒪᒃᑭᕐᓗᒍ ᐃᓅᓯᖏᑦ.

ᓇᓚᐅᖅᑖᖅᑕᐅᔪᖅ ᐊᑕᐅᓯᑐᐊᐸᓗᒃ ᑕᓪᓕᒪᐅᓗᑎᒃ ᓄᑕᖅᑲᑦ ᐱᔭᕆᐊᖃᖅᑐᓂ ᐃᓱᒪᓕᕆᓂᕐᒧᑦ ᐱᔨᑦᑎᕋᐅᑎᓂᒃ ᐱᕙᒃᐳᑦ.ii

iCanadian Mental Health Association, http://www.cmha.ca/news/cmhas-62nd-annual-mental-health-week/#.VxZorqu9dUM
iiibid.

-30-
 

ᐱᔾᔪᑎᒋᓪᓗᒋᑦ ᑲᓇᑕᒥᐅᓄ ᑲᑎᒪᔩᑦ ᓄᑕᖅᑲᓐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒋᔭᐅᔪᑦ

ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᓪᓗᑎᒃ ᑲᑐᔾᔨᖃᑎᒌᖑᕗᑦ ᒪᓕᒐᑎᒍᑦ ᑎᓕᔭᐅᓯᒪᓪᓗᑎᒃ ᑭᒡᒐᖅᑐᐃᔨᐅᓪᓗᑎᒃ ᐱᔪᓐᓇᐅᑎᒋᔭᐅᔪᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ. ᑕᒪᒃᑯᐊ ᑭᒡᒐᖅᑐᖅᑏᑦ ᐊᐅᓚᑐᐃᓐᓇᕆᐊᖃᖅᐳᑦ ᐊᔾᔨᒌᙱᑦᑐᑎᒍᑦ ᑕᐃᔭᐅᕙᒃᑐᑎᒍᑦ (ᓲᕐᓗ ᐃᒪᓐᓇ,−ᑭᐅᓯᔨ ᑭᒡᒐᖅᑐᐃᔨ,ᐱᓕᕆᖃᑎᖃᖅᑎ, ᑲᒥᓯᓇ) ᑭᓯᐊᓂ ᑕᒪᕐᒥᑦᑎᐊᖅ ᑭᒡᒐᖅᑐᖅᑎᓪᓚᕆᒋᔭᐅᕗᑦ ᐅᖃᐅᓯᐅᓯᒪᔪᓂ ᐊᕕᒃᓯᒪᓂᕆᔭᐅᔪᓂ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᓂ. ᑕᒪᕐᒥᑦᑎᐊᖅ CCCYA−ᒧᑦ ᐃᓚᒋᔭᐅᔪᑦ ᐃᓛᒃᑰᖅᖢᑎᒃ ᐱᓕᕆᔨᓪᓚᕆᐅᓪᓗᑎᒃ ᐅᖃᕐᕕᖃᑲᐅᑎᒋᕙᒃᖢᑎᒃ ᒪᓕᒐᓕᐅᕐᕕᖕᒥᐅᓄᑦ ᐱᓕᕆᕝᕕᒋᔪᓐᓇᖅᑕᒥᓂ ᐃᓂᒥᓂᒃ ᐱᔾᔪᑎᖃᕐᓗᑎᒃ. ᑕᒪᕐᒥᒃ ᐊᑐᓂᑦ CCCYA−ᒧᑦ ᐃᓚᒋᔭᐅᔪᓄᑦ ᑎᑎᕐᕕᒋᔭᐅᔪᖅ ᐋᖅᑭᒃᑕᐅᓯᒪᕗᖅ ᐱᖁᔭᑎᒍᑦ ᐊᐅᓚᓂᐊᕐᓗᑎᒃ ᐃᓛᒃᑰᕐᓗᑎᒃ ᒐᕙᒪᒃᑯᑦ ᐱᔪᓐᓇᐅᑎᒋᔭᖏᓐᓂᑦ ᐊᐅᓚᑕᖏᓐᓃᓪᓘᓐᓃᑦ. ᑲᑎᒪᔨᒋᔭᐅᔪᑦ ᐃᓚᖃᖅᐳᑦ ᐃᓚᒋᔭᐅᔪᓂᒃ 9-ᓂᑦ ᐊᕕᒃᓯᒪᓂᕆᔭᐅᔪᓂᑦ ᒪᕐᕉᖕᓂᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂᑦ ᐅᑯᓇᓂ, ᐋᓪᐴᑕ, ᕈᐳᕆᑎᔅ ᑲᓚᒻᐱᐊ, ᒪᓂᑑᐸ, ᓂᐅ ᐳᕋᓐᔅᐅᐃ, ᓂᐅᕙᐅᓐᓛᓐᑦ, ᐊᒻᒪᓗ ᓛᐸᑐᐊ, ᓅᕙ ᒡᑰᓯᐊ, ᓄᓇᕗᑦ, ᐊᓐᑎᐅᕆᐅ, ᑯᐃᐸᒃ, ᓇᔅᑳᑦᓱᐊᓐ ᐊᒻᒪᓗ ᔫᑳᓐ.