ᑭᓱᓂᒃ ᓂᕆᐅᒋᐊᒃᓴᖅ


ᓯᕗᓪᓕᕐᒥ ᖃᐅᔨᒋᐊᕐᕕᒃᓴᖅ

ᑎᑎᕋᖅᑎᕗᑦ ᑭᐅᔪᓐᓇᖅᑐᑦ ᖃᐅᔨᒋᐊᖅᑳᖅᑐᓕᒫᓂᒃ ᑎᑎᕋᕐᕕᑦᑎᓐᓂ - ᐅᖃᓘᑎᒃᑰᕋᓗᐊᖅᐸᑦ, ᐃᕐᖐᓐᓈᖅᑕᐅᒃᑰᕋᓗᐊᖅᐸᑦ, ᑎᑎᖅᑲᒃᑯᕕᒃᑰᕋᓗᐊᖅᐸᑦ,
ᓱᒃᑲᔪᒃᑰᕋᓗᐊᖅᐸᑦ ᐅᕝᕙᓘᓐᓃᑦ ᐅᐸᒍᑎᓪᓚᑦᑖᕋᓗᐊᖅᐸᑕ. ᖃᐅᔨᒋᐊᖅᑐᑦ ᓄᑕᖅᑲᑦ ᒪᒃᑯᒃᑐᓪᓗ ᓯᕗᓪᓕᐅᑎᓲᕗᑦ.

  • ᒪᒃᑯᒃᑑᑉ ᐱᔾᔪᑕᐅᔫᑉ ᐊᑎᖓ (ᐃᓐᓇᐅᑐᐊᕈᕕᑦ)
  • ᒪᒃᑯᒃᑑᑉ ᐃᓅᕝᕕᐊ
  • ᐊᑏᑦ
  • ᐅᖃᓘᑎᕕᑦ ᓈᓴᐅᑖ, ᐃᕐᖐᓐᓈᖅᑕᐅᑎᕕᑦ ᑐᕌᕈᑖ ᐊᒻᒪ/ᐅᕝᕙᓘᓐᓃᑦ ᑐᕌᕈᑎᑦ
  • ᑭᓱ ᐱᔾᔪᑎᒋᓪᓗᒍ ᐃᓱᒫᓘᑎᒋᔭᑎᑦ

ᐱᓕᕆᔨᒻᒪᕆᒃ ᑖᒃᑯᓂᖓ ᑐᓴᖅᑲᐅᔭᒥᓂᒃ ᑐᑭᓯᒋᐊᒐᒃᓴᓂᒃ ᑐᓐᓂᖅᑯᑎᖃᕋᔭᖅᖢᓂ ᐃᖅᑲᓇᐃᔭᖅᑎᐅᖃᑕᐅᔪᒧᑦ ᐃᑲᔪᕈᓐᓇᕐᓂᖅᐹᒧᑦ ᐃᓕᖕᓄᑦ.

ᑭᒡᒐᖅᑐᐃᔨᒥᒃ ᐱᓕᕆᖃᑎᖃᕐᓂᖅ

ᐅᖃᓘᑎᖃᕈᕕᑦ ᐱᔾᔪᑎᒋᔭᕐᓂᒃ, ᐱᓕᕆᔨᒻᒪᕆᒃ ᑲᒪᒋᔭᒃᓴᕆᓇᔭᖅᑕᕐᓄᑦ ᖃᐅᔨᑎᑎᓇᔭᖅᐳᖅ ᓄᑕᖅᑲᓂᒃ ᒪᒃᑯᒃᑐᓂᒡᓘᓐᓃᑦ ᑭᒡᒐᖅᑐᐃᔨᑦᑎᓐᓄᑦ. ᑲᒪᒋᔭᒃᓴᕆᓇᔭᖅᑕᑦ ᑐᑭᓯᓇᖅᓯᑎᑦᑎᒃᑲᓐᓂᕋᔭᖅᐳᖅ ᑎᑎᕋᕐᕕᑦᑎᓐᓂ ᖃᓄᐃᓕᐅᓲᖑᖕᒪᖔᑦᑕ. ᐅᖃᐅᓯᖃᕋᔭᖅᑐᑦ ᖃᓄᐃᓕᐅᕐᓗᑕ ᐃᑲᔪᕈᓐᓇᕐᒪᖔᑦᑕ.  ᑐᑭᓯᓇᖅᓯᑎᑦᑎᓇᔭᕆᓪᓗᑎᒃ ᐱᓕᕆᐊᖑᑎᑕᐅᑎᑕᑦ ᑲᙳᓇᖅᑐᒃᑰᕆᐊᖃᕐᓂᖓᓂᒃ. ᑭᒡᒐᖅᑐᐃᔨᒻᒪᕆᒃ ᐃᓕᖕᓂᒃ ᐊᖏᖅᓯᓇᔭᖅᐳᖅ ᐅᕝᕙᓘᓐᓃᑦ ᓄᑕᕋᖅ ᐃᑲᔪᖅᐅᑕᔪᒪᑐᐊᖅᐸᑦ ᑖᔅᓱᒧᖓ.  ᑭᒡᒐᖅᑐᐃᔨᒻᒪᕆᒃ ᐃᒪᐃᓕᐅᓕᕋᔭᖅᖢᓂ ᑭᖑᓂᐊᒍᑦ:

  • ᐃᓱᒫᓘᑎᒋᔭᑎᑦ ᓈᓚᒡᓗᓂᒋᑦ
  • ᐊᐱᖅᓱᖅᐸᒡᓗᓂ ᐱᔾᔪᑕᐅᔪᒥᒃ ᑐᑭᓯᓇᓱᒡᓗᓂ
  • ᐅᖃᐅᓯᖃᖅᐸᒡᓗᓂ ᐱᒻᒪᕆᐅᓂᖓᓂᒃ ᒪᒃᑯᒃᑐᒧᑦ ᖃᓄᐃᓕᐅᖁᔭᖏᑦ ᐱᓕᕆᐊᑦᑎᓐᓂ
  • ᐅᖃᐅᓯᖃᖅᐸᒡᓗᑕ ᖃᓄᐃᓕᐅᕐᓗᑕ ᐃᑲᔪᕈᓐᓇᕐᒪᖔᑦᑕ

ᐃᓄᑐᐊᓂᒃ ᑭᒡᒐᖅᑐᐃᔨᑦ ᐊᐅᓚᑕᐅᔪᑦ ᓄᑕᖅᑲᒧᑦ ᒪᒃᑯᒃᑐᒧᓪᓘᓐᓃᑦ

ᑐᙵᓱᒃᑎᑦᑎᓲᖑᕗᒍᑦ ᐊᓯᖏᓐᓄᑦ ᑐᓐᓂᖅᑯᑕᐅᔭᕆᐊᖃᖅᐸᒃᑐᓂᒃ ᐊᒻᒪ ᖃᐅᔨᓴᖅᑕᐅᓯᒪᔪᓂᒃ. ᑭᓯᐊᓂ, ᐃᓄᑐᐊᓂᒃ ᑭᒡᒐᖅᑐᐃᔨᑦ ᐱᓕᕆᐊᖓᑦ ᐊᐅᓚᑕᐅᒐᔪᒃᖢᑎᒃ ᒪᒃᑯᒃᑐᒧᑦ ᐱᔾᔪᑕᐅᔪᒧᑦ, ᐱᔪᓐᓇᕐᓂᕆᔭᖓ ᒪᓕᒃᑕᐅᓪᓗᓂ.

ᐃᓛᓐᓂᒃᑯᑦ ᐃᓐᓇᕐᒥᒃ ᐃᓱᒫᓘᑎᒋᔭᒥᓂᒃ ᓴᖅᑭᑦᑎᔪᖃᓚᐅᖅᐸᖕᒪᑦ ᓄᑕᖅᑲᒥᒃ ᐱᔾᔪᑎᖃᕐᓗᓂ. ᑕᐃᒪᐃᑦᑐᖃᕌᖓᑦ, ᒪᒃᑯᒃᑐᑦ ᐅᖃᐅᓯᐅᔪᖅ ᖃᐅᔨᒋᐊᕐᕕᒋᓪᓚᑦᑖᕋᓱᓲᕗᑦ.

ᒪᒃᑯᒃᑐᒥᒃ ᐃᑲᔪᖅᑎᒋᔭᐅᔪᒪᒍᑦᑕ ᐱᓕᕆᖃᑎᒌᒃᑎᑦᑎᖃᑦᑕᕋᔭᖅᑐᒍᑦ ᐃᓄᑑᖃᑎᒌᒡᓗᑎᒃ ᐱᓕᕆᖃᑎᒋᔭᐅᔪᖅ ᐊᒻᒪ ᑭᒡᒐᖅᑐᐃᔨᒻᒪᕆᒃ. ᑲᑐᔾᔨᖃᑎᒌᒡᓗᑎᒃ, ᑭᒡᒐᖅᑐᐃᔾᔪᑎᒃᓴᒥᒃ ᐸᕐᓇᐃᓇᔭᕐᒪᑎᒃ. ᐸᕐᓇᒃᑕᐅᔪᖅ ᐃᓚᓕᐅᔾᔨᓯᒫᕐᔪᑐᐃᓐᓇᕈᓐᓇᕐᒪᑦ ᑐᑭᓯᒋᐊᒐᒃᓴᓂᒃ.  ᐋᖅᑭᒍᑕᐅᔪᓐᓇᕐᒪᓪᓘᓐᓃᑦ ᐊᓯᖔᖓᓂᒃ ᐃᓄᑐᐊᓄᑦ ᑭᒡᒐᖅᑐᐃᔾᔪᑎᒃᓴᒥᒃ.  

ᐃᓛᓐᓂᒃᑯᑦ ᐃᓱᒪᔪᓐᓇᕋᑦᑕ ᓄᑕᖅᑲᑦ ᐃᓚᖏᑦ ᐱᔪᓐᓇᕐᓂᖃᕋᓱᒋᙱᖦᖢᑎᒍᑦ ᑭᒡᒐᖅᑐᐃᔾᔪᑎᒃᓴᓄᑦ ᐱᓕᕆᐊᑦᑎᓐᓂᒃ. ᑕᒪᒃᑯᐊ ᐱᔾᔪᑕᐅᔭᕌᖓᑕ, ᑎᑎᕋᕐᕕᑦᑎᓐᓂᙶᖅᑐᒥᒃ ᐃᖅᑲᓇᐃᔭᖅᑎᒥᒃ ᐱᓕᕆᖃᑎᖃᖅᑎᑦᑎᓲᖑᓪᓗᑕ ᐃᓱᒪᓕᐅᖅᑎᒋᓗᑎᒍᑦ ᖃᓄᐃᓕᐅᕐᓗᑕ ᐃᑲᔪᖅᓱᐃᔪᓐᓇᕐᒪᖔᑦᑕ.

ᐊᓯᖏᑦ ᐃᑲᔫᑕᐅᓲᑦ

ᐱᓕᕆᔨᒻᒪᕆᒃ ᐃᓱᒪᓕᐅᕆᑐᐃᓐᓇᕆᐊᖃᖅᖢᓂ ᑐᒃᓯᕋᐅᑎᒋᔭᐃᑦ ᐊᓯᐊᓄᖔᖅ ᐱᓕᕆᔨᐅᖃᑎᒋᔭᑦᑎᓐᓄᑦ ᑐᓐᓂᖅᑯᑎᒋᖔᕐᓗᓂᐅᒃ. ᑕᒪᓐᓇ ᐊᑐᖅᑕᐅᓕᕋᔭᖅᐳᖅ ᐃᒪᐃᑦᑐᖃᕐᓂᖅᐸᑦ:

  • ᐃᓱᒫᓘᑎᖃᑐᐊᕈᕕᑦ ᐊᓯᖔᖓᓂᒃ ᐃᓱᒪᒋᔭᒃᓴᕐᔪᐊᕌᓗᖕᒥᒃ
  • ᐅᖃᐅᓯᖃᕈᒪᒍᕕᑦ ᕿᒥᕐᕈᔭᐅᓯᒪᔪᒥᒃ ᐃᓕᙵᒡᔪᐊᖅᑐᕕᓂᕐᒥᒃ ᑐᖁᔪᖃᓚᐅᖅᑎᓪᓗᒍᓘᓐᓃᑦ
  • ᐃᓄᖕᓂᙶᖅᑐᒥᒃ ᐅᖃᓪᓚᒋᐊᖅᑐᖁᔨᑐᐊᕈᕕᑦ

ᐱᓕᕆᔨᒻᒪᕆᒃ ᐱᓕᕆᖃᑎᒋᔭᕆᐊᖃᖅᑕᕐᓄᑦ ᖃᐅᔨᑎᑦᑏᓐᓇᕈᓐᓇᖅᑐᖅ.