ᐊᖓᔪᖅᑳᓄᑦ ᐊᐱᖅᑯᑕᐅᒐᔪᒃᑐᑦ


ᐊᖓᔪᖅᑳᑦ ᖃᑕᙳᑎᖏᓪᓗ ᐊᐱᖅᑯᑎᒃᓴᖃᕋᔪᖕᒪᑕ ᓄᑕᖅᑲᑦ ᐱᔪᓐᓇᐅᑎᖏᑕ ᒥᒃᓵᓄᑦ. ᐅᑯᐊ ᓇᐃᓈᖅᓯᒪᒐᓗᐊᖅᖢᑎᒃ ᑎᑎᕋᖅᓯᒪᔪᑦ ᑭᐅᔾᔪᑕᐅᒐᓛᒃᑐᑦ ᐊᐱᖅᑯᑕᐅᒐᔪᓛᓂᒃ ᑐᓴᖅᐸᒃᑕᑦᑎᓐᓂ ᐊᖓᔪᖅᑳᖑᔪᓂᒃ.

ᑭᓲᖕᒪᑕ ᓄᑕᖅᑲᓄᑦ ᐱᔪᓐᓇᐅᑎᑦ?

ᓄᑕᖅᑲᑦ ᐱᔪᓐᓇᐅᑎᖏᑦ ᓄᑕᕋᓕᒫᑦᑎᐊᓄᑦ ᐱᒋᔭᐅᔪᐃᓐᓇᐅᔭᕆᐊᖃᖅᐳᑦ ᐱᓕᕆᐊᕆᔪᓐᓇᕐᓗᓂᒋᓪᓘᓐᓃᑦ ᐃᓅᓯᖃᑦᑎᐊᕈᓐᓇᕐᓂᕐᒧᑦ ᐊᒻᒪ ᓯᕗᒻᒧᐊᒍᓐᓇᕐᓂᕐᒧᑦ. ᓄᑕᖅᑲᑦ ᐱᔪᓐᓇᐅᑎᖏᑦ ᒪᑯᐊᖑᕗᑦ:

  • ᓂᕆᔭᒃᓴᑦᑎᐊᕙᖕᓂᒃ ᓂᕆᖃᑕᐅᔭᕆᐊᖃᖅᑐᑦ
  • ᐊᖏᕐᕋᑦᑎᐊᕙᖕᒥ ᐊᖏᕐᕋᖃᖃᑕᐅᔭᕆᐊᖃᖅᑐᑦ
  • ᐋᓐᓂᖅᓱᖅᑕᐅᕙᙱᓪᓗᑎᒃ ᐃᓅᖃᑕᐅᔭᕆᐊᖃᖅᑐᑦ
  • ᐃᓕᖅᑯᓯᕆᔭᒥᓂᒃ ᐃᓅᓇᓱᐊᕆᐊᖃᖅᑐᑦ
  • ᑲᒪᒋᔭᐅᑦᑎᐊᕐᓗᑎᒃ, ᐊᔪᕐᓇᙱᓐᓂᓕᒫᖓᓂᒃ, ᐊᖓᔪᖅᑳᒥᓄᑦ
  • ᐊᒻᒪ ᓄᑕᖅᑲᑦ ᐅᖃᕈᒪᔭᖏᓐᓂᒃ ᐅᖃᕈᓐᓇᕐᓗᑎᒃ ᐊᖓᔪᒋᔭᖏᓐᓂᒡᓗ ᓈᓚᒃᑕᐅᔪᓐᓇᕐᓗᑎᒃ

ᖃᐅᔨᔪᒪᔭᖃᒃᑲᓐᓂᕈᕕᑦ, ᖃᐅᔨᒋᐊᕈᓐᓇᖅᐳᑎᑦ ᐅᑯᓂᖓ ᑐᑭᓯᓇᖅᑐᓂᒃ ᑎᑎᕋᖅᓯᒪᔪᓂᒃ ᓄᓇᕐᔪᐊᕐᒥ ᑲᑐᔾᔨᖃᑎᒌᓄᑦ ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᓪᓗᒋᑦ. ᑐᑭᓯᓇᖅᑎᓯᒪᔪᖅ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᖃᔅᓯᑲᓪᓛᓗᐃᑦ ᓄᓇᓖᑦ ᓄᓇᕐᔪᐊᕐᒥ ᐊᑐᓕᖅᓯᒪᔭᖓᑦ. ᑐᑭᓯᓇᖅᓯᑎᓯᒪᒋᓪᓗᑎᒃ ᖃᓄᖅ ᒐᕙᒪᒃᑯᑦ ᐊᒻᒪ ᖃᑕᙳᑎᒌᑦ ᖃᓄᐃᓕᐅᕆᐊᖃᕐᒪᖔᑕ ᐃᑲᔪᖅᓱᕐᓗᒋᑦ ᓄᑕᖅᑲᑦ ᐱᔪᓐᓇᐅᑎᖏᑦ.

ᖃᓄᖅ ᓄᑕᖅᑲᑦ ᐱᔪᓐᓇᐅᑎᖏᑦ ᐊᒃᑐᐃᔾᔪᑎᒋᔪᓐᓇᖅᐸᒃᑲ ᐱᔪᓐᓇᕐᓂᕆᔭᓐᓄᑦ ᕿᑐᕐᖓᕋ ᐱᕈᖅᓴᕐᓂᐊᖅᑎᓪᓗᒍ ᖃᐅᔨᒪᑎᓐᓂᐊᖅᑎᓪᓗᒍᓗ?

ᓄᑕᖅᑲᑦ ᐱᔪᓐᓇᐅᑎᖏᑦ ᐱᐅᔪᒥᒃ ᐊᒃᑐᐃᔾᔪᑕᐅᓲᑦ ᐱᕈᖅᓴᖅᑎᓪᓗᓯᐅᒃ ᕿᑐᕐᖓᓯ. ᖃᐅᔨᒪᓗᒋᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔪᓐᓇᕐᓂᖅᑖᖅᑎᑦᑎᔪᓐᓇᖅᑐᑦ ᕿᑐᕐᖓᔅᓯᓐᓂᒃ ᐊᒻᒪ ᐃᓕᔅᓯᓐᓂᒃ. ᑭᒡᒐᖅᑑᑎᒋᔪᓐᓇᕋᔅᓯᐅᒃ ᒐᕙᒪᒃᑯᓐᓄᑦ ᐱᔨᑦᑎᕋᖅᑕᐅᒃᑲᓐᓂᕈᑎᒃᓴᓄᑦ ᐱᓕᕆᐊᖑᔪᒃᓴᓄᓪᓗ ᐃᑲᔪᕐᓗᒋᑦ ᖃᑕᙳᑎᒌᑦ.  ᑖᓐᓇ ᐱᔾᔪᑎᖃᖅᐳᖅ ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᐊᒃᓱᒻᒪᕆᐊᓗᒃ ᖃᑕᙳᑎᒌᓄᑦ ᑎᑎᖅᑲᓕᐊᕆᓯᒪᖕᒪᑕ. ᐊᔪᙱᔾᔪᑕᐅᖕᒪᑦ ᐊᖓᔪᖅᑳᓄᑦ ᐱᓕᕆᔾᔪᑖᓄᑦ ᕿᑐᕐᖓᒥᖕᓂᒃ ᐱᕈᖅᓴᐃᑎᓪᓗᒋᑦ. ᐃᓕᑕᖅᓯᐅᒪᖕᒥᖕᒪᑦ ᒐᕙᒪᒃᑯᑦ ᐃᑲᔪᕆᐊᖃᕐᓂᖏᓐᓂᒃ ᖃᑕᙳᑎᒌᓂᒃ ᐊᔪᕐᓇᖅᑐᖅᓯᐅᖅᑐᓂᒃ.

ᕿᑐᕐᖓᕋ ᑭᐅᓗᒐᔭᖅᐸ ᖃᐅᔨᒃᐸᑦ ᓄᑕᖅᑲᑦ ᐱᔪᓐᓇᐅᑎᖏᓐᓂᒃ ᐃᒻᒥᓂᒃ ᓴᖅᑭᓐᓇᓱᒃᑎᓪᓗᒍ?

ᓄᑕᖅᑲᒥᒃ ᑭᐅᓗᒃᑐᖃᖅᐸᑦ, ᖃᐅᔨᕚᓪᓕᕈᑎᒋᔪᓐᓇᕋᔭᖅᑕᑦ. ᕿᑐᕐᖓᐃᑦ ᐃᑲᔪᕈᓐᓇᖅᑕᑦ ᐃᓱᒪᒋᔭᖏᓐᓂᒃ ᐅᖃᓪᓚᒃᑎᑉᐸᒡᓗᒍ. ᑭᓯᐊᓂᑦᑕᐅᖅ ᑐᓴᖅᑎᑦᑐᓐᓇᕐᒥᔭᑦ ᐃᓄᐃᑦ ᐱᔪᓐᓇᐅᑎᖃᖅᑐᐃᓐᓇᐅᓂᖏᓐᓂᒃ ᐊᓯᒥᓂᒃ ᐃᒃᐱᒍᓱᒋᐊᖃᕐᓂᕐᒥᒃ. ᑐᑭᓯᓇᖅᓯᑎᓪᓗᒍ ᑖᓐᓇ ᐃᑲᔫᑕᐅᔪᓐᓇᕐᒪᑦ ᐅᖃᐅᓯᕆᕙᓪᓕᐊᔭᔅᓯᓐᓂᒃ ᕿᑐᕐᖓᔅᓯᓐᓄᑦ ᐃᒃᐱᒋᑦᑎᐊᖏᓐᓇᕐᓗᒋᑦ. 


ᕿᑐᕐᖓᕋ ᐱᔪᓐᓇᐅᑎᖏᓐᓂᒃ ᐊᑐᕋᔭᖅᐸ ᐱᔪᒪᔭᒥᓂᒃ ᐊᑐᕈᒪᓗᐊᒧᑦ?

ᐃᒻᒪᖄ ᐃᕐᓃᑦ ᓄᖑᓴᒐᖅᑖᕈᒪᐃᓐᓇᕐᓗᓂ, ᐋᒃᑳᖅᓯᒪᒐᓗᐊᖅᑎᓪᓗᑎᑦ. ᐃᒻᒪᖄᓗ ᐸᓃᑦ ᐃᓚᒥᖕᓂᒃ ᐱᓕᕆᐊᕆᖁᔭᐅᔪᓂᒃ ᐱᓕᕆᔪᒪᙱᓪᓗᓂ ᐅᖃᕐᓗᓂᓗ ᐱᔪᓐᓇᐅᑎᖃᕐᓂᖓᓂᒃ ᒫᓐᓇ ᐱᙳᐊᕈᓐᓇᕐᓂᕋᕐᓗᓂ.  ᑖᓐᓇᑦᑕᐅᖅ ᐃᓕᑉᐹᓪᓕᕈᑕᐅᔪᓐᓇᕐᒥᔪᖅ. ᐱᕕᒃᓴᖃᓕᕋᔭᕋᔅᓯ ᑐᑭᓯᓇᖅᓯᑎᓪᓗᒋᑦ ᐱᔪᓐᓇᐅᑎᑦ ᐱᔭᐅᔪᒪᔪᓪᓗ ᐊᔾᔨᒌᙱᓐᓂᖏᓐᓂᒃ. ᑐᑭᓯᓇᖅᓯᑎᑦᑐᓐᓇᕐᒥᔭᑦ ᑕᒪᒃᑯᐊ ᐱᔪᓐᓇᐅᑎᑦ ᓄᑕᖅᑲᓄᑦ ᐱᔪᓐᓇᐅᑕᐅᓂᖏᓐᓂᒃ. ᐃᑲᔫᑕᐅᔪᓐᓇᕐᒪᑕ ᓄᑕᖅᑲᓄᑦ ᓯᕗᒻᒧᐊᒍᑎᒋᓗᓂᒋᑦ. ᑭᓯᐊᓂ ᐱᔭᐅᔪᒪᔪᑦ ᐱᔪᓐᓇᐅᑕᐅᙱᒻᒪᑕ. ᐱᔭᐅᔭᕆᐊᖃᙱᒻᒪᑕ ᓯᕗᒻᒧᐊᒍᑕᐅᓇᓱᒡᓗᑎᒃ ᐱᕙᓪᓕᐊᔾᔪᑕᐅᓇᓱᒡᓗᑎᒡᓗ.  ᐅᖃᕆᐊᖃᕆᓪᓗᑎᑦ ᐃᕝᕕᑦ, ᐊᖓᔪᖅᑳᖑᑎᓪᓗᑎᑦ, ᑲᒪᒋᔭᒃᓴᖃᕐᓂᕐᓂᒃ ᕿᑐᕐᖓᕕᑦ ᖃᓄᐃᙱᑦᑎᐊᕈᑖᓄᑦ.  ᐳᐃᒍᖅᑕᐃᓕᓗᓯ ᓄᑕᖅᑲᑦ ᐱᔪᓐᓇᐅᑎᖏᑦ ᐊᖓᔪᖅᑳᕆᔭᓄᑦ ᕿᑐᕐᖓᕆᔭᐅᔪᓄᓪᓗ ᐊᑭᕋᖅᑑᑕᐅᓕᕈᑎᒃᓴᐅᙱᓐᓂᖏᓐᓄᑦ! ᓄᑕᖅᑲᑦ ᐱᔪᓐᓇᐅᑎᖏᑦ ᐃᒻᒥᓂᒃ ᓴᖅᑭᓐᓂᐊᖅᑎᓪᓗᒋᑦ ᐃᑲᔫᑕᐅᔪᓐᓇᖅᑐᑦ ᖃᑕᙳᑎᒌᓄᑦ. ᐊᔾᔨᒋᔭᐅᙱᑦᑎᐊᖅᑐᒥᒃ ᐱᒻᒪᕆᐅᔪᒥᒡᓗ ᓴᖅᑭᑦᑐᖃᕈᓐᓇᕐᒪᑦ.

ᖃᓄᐃᓕᐅᕐᓗᖓ ᕿᑐᕐᖓᒪ ᐱᔪᓐᓇᐅᑖ ᐃᑲᔪᖅᓱᕈᓐᓇᕋᒃᑯ?

ᖃᑕᙳᑎᒌᑦ ᐃᑲᔪᕈᓐᓇᖅᑐᑦ ᕿᑐᕐᖓᖏᑦᑕ ᐱᔪᓐᓇᐅᑎᖏᓐᓂᒃ ᑐᑭᓯᕚᓪᓕᖅᑎᑐᐃᓐᓇᖅᐸᒡᓗᒋᑦ. ᖃᐅᔨᒪᒍᕕᑦ ᕿᑐᕐᖓᕕᑦ ᐱᔪᓐᓇᐅᑎᖏᑦ ᑭᓲᖕᒪᖔᑕ, ᐃᑲᔪᕈᓐᓇᖅᑕᓯ ᑭᒡᒐᖅᑐᕐᓗᒋᒃ ᑖᒃᑯᐊ ᐱᔪᓐᓇᐅᑎᒋᔭᐅᔪᑦ. ᑎᑎᕋᕐᕕᑦᑎᓐᓄᑦ ᖃᐅᔨᒋᐊᖃᑦᑕᕈᓐᓇᖅᑐᓯ ᑐᑭᓯᒋᐊᖃᒃᑲᓐᓂᑐᐊᕈᔅᓯ. ᑕᒫᓃᑦᑐᒍᑦ ᐊᐱᖅᑯᑎᔅᓯᓐᓂᒃ ᑭᐅᖃᑦᑕᕈᒪᓪᓗᑕ!