ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔩᑦ ᐅᖃᐅᓯᕆᔭᖓᓂᒃ ᐱᔾᔪᑎᖃᕐᓗᑎᒃ ᓄᓇᖃᖅᑳᖅᑐᑦ ᓄᑕᖅᑲᑦ ᖃᓄᐃᙱᑦᑐᓐᓇᕐᓂᖏᓐᓂᒃ


(ᔭᓄᐊᕆ 31, 2018) - ᐱᓇᓱᐊᕈᓯᐅᓵᖅᑐᒥ ᑐᐊᕕᕐᓇᖅᑐᒥᒃ ᑲᑎᒪᔪᖄᓪᓚᓚᐅᖅᑎᓪᓗᒍ ᓄᓇᖃᖅᑳᖅᑐᑦ ᓄᑕᖅᑲᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐋᑐᕚᒥ ᑕᒪᓐᓇᓗ ᑲᔪᓯᑎᑕᐅᓚᐅᖅᖢᓂ ᓄᓇᖃᖅᑳᖅᑐᑦ ᐱᔨᑦᑎᕋᕐᕕᐅᕙᖕᓂᖏᓐᓄᑦ ᒥᓂᔅᑕᒥᑦ ᔭᐃᓐ ᐱᓕᐹᑦ ᐊᒻᒪᓗ ᑯᐃᓐ ᑭᒡᒐᖅᑐᖅᖢᒍ ᓄᓇᖃᖅᑳᖅᑐᓂᒃ ᐱᓕᕆᖃᑎᖃᖅᐸᖕᓂᕐᒧᑦ ᐅᑭᐅᖅᑕᖅᑐᒥᓗ ᐱᓕᕆᐊᒃᓴᓄᑦ ᒥᓂᔅᑕᕆᔭᐅᔪᖅ ᑭᐅᕈᓕᓐ ᐱᓂᑦ , ᑲᓇᑕᒥᐅᓄᑦ ᑲᑎᒪᔨᒋᔭᐅᔪᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓂᒃ (CCCYA−ᓂᒃ ᓴᖅᑭᑎᑦᑎᓯᒪᓕᖅᐳᑦ ᐆᒥᖓ ᐅᖃᐅᓯᐅᓯᒪᔪᒥᒃ:

ᐃᓛᒃᑰᖅᖢᑎᒃ ᓄᑕᖅᑲᓄᑦ ᑭᒡᒐᖅᑐᐃᔨᒋᔭᐅᑎᓪᓗᒋᑦ 9−ᓂ ᐊᕕᒃᓯᒪᓂᕆᔭᐅᔪᓂ ᒪᕐᕉᖕᓂᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᓄᑦ, ᐱᓕᕆᐊᖃᓪᓚᕆᒍᒪᕗᒍᑦ ᐅᔾᔨᕐᓇᖅᓯᑎᑦᑎᓂᕐᒥᒃ ᑲᔪᓯᑎᑦᑎᓂᕐᒥᒡᓗ ᐃᒃᐱᒋᔭᖃᑦᑎᐊᕐᓂᕐᒥᐱᔪᓐᓇᐅᑎᒋᔭᐅᔪᓂᒃ ᓄᑕᖅᑲᓕᒫᓄᑦ ᒪᒃᑯᒃᑐᓄᓪᓗ ᐊᒻᒪᓗ, ᐱᓗᐊᙳᐊᖅᖢᓂ, ᐱᔪᓐᓴᐅᑎᓪᓚᕆᒋᔭᖏᓐᓂᒃ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᖁᐊᖅᓵᕐᓇᖅᑐᒦᙱᓐᓂᕐᒧᑦ, ᐃᓕᓐᓂᐊᖅᑎᑦᑎᓂᕐᒧᑦ ᐃᓅᓯᑦᑎᐊᕆᒍᓐᓇᕐᓂᕐᒧᓪᓗ.

ᒐᕙᒪᑐᖃᒃᑯᓐᓂ ᒥᓂᔅᑕᐃᑦ ᐊᓯᖏᓪᓗ ᐅᖃᖅᓯᒪᕗᑦ ᑭᒡᒐᖅᑐᖅᑕᐅᓗᐊᕐᓂᖏᑦ ᓄᓇᖃᖅᑳᖅᑐᑦ ᓄᑕᖅᑲᑦ ᒪᒃᑯᒃᑐᓪᓗ ᑲᒪᒋᔭᐅᕙᒃᑐᑦ ᑲᓇᑕᒥ ᑎᑭᐅᑎᓯᒪᓕᕐᓂᖓᓂᒃ “ᑐᐊᕕᕐᓇᓪᓚᕆᒃᑐᓄᑦ”. ᖃᐅᔨᒪᓂᑦᑎᓐᓂᒃ ᓇᓗᓇᐃᖅᓯᕗᒍᑦ ᑕᒪᓐᓇ ᑭᒡᒐᖅᑐᐃᓂᖓᓂᒃ ᐊᖏᔪᑲᓪᓚᖕᒥᒃ ᐊᓂᒍᖅᑎᓐᓇᓱᒋᐊᓕᖕᒥᒃ ᓄᓇᑦᑎᓐᓄᒃ, ᑕᒪᓐᓇ ᐊᖏᒡᓕᒋᐊᖅᑎᑕᐅᓯᒪᓪᓗᓂ ᐊᑐᖅᑕᐅᕙᓚᐅᖅᑐᓂᒃ ᐊᐅᖃᑎᒋᙱᑕᒥᒃ ᐃᓚᓕᐅᔾᔨᓇᓱᖕᓂᕐᒥᒃ, ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐊᐅᖃᑎᒌᙱᓐᓂᕐᒧᑦ ᐊᑭᖃᖅᑐᓯᕙᖕᓂᖅ ᐊᒻᒪᓗ ᐊᒃᖢᓪᓚᕆᒃᐸᖕᓂᕐᒧᑦ.

ᐃᓕᓴᖅᓯᕗᒍᑦ ᐱᓕᕆᕝᕕᖃᕐᓂᖅ ᑕᒪᑐᒥᖓ ᑭᒡᒐᖅᑐᖅᑕᐅᓗᐊᕐᓂᕐᒥᒃ ᐱᔭᒃᓴᕆᔭᐅᑐᐃᓐᓇᙱᓐᓂᖓᓂᒃ ᒐᕙᒪᑐᖃᒃᑯᓐᓂᑦ ᐊᑕᐅᓯᑐᐊᕐᒥᓪᓘᓐᓃᑦ ᐊᕕᒃᓯᒪᓂᕆᔭᐅᔪᒥᑦ, ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥᑦ ᓄᓇᖃᖅᑳᖅᑐᑦ ᓄᓇᖓᓐᓂᑦ ᑲᑐᔾᔨᖃᑎᒌᖓᓂᓪᓘᓐᓃᑦ. ᓇᓂᓯᓂᖅ ᐋᖅᑭᒃᓯᒪᓕᕈᑕᐅᔪᓐᓇᖅᑐᓂᒃ ᐊᒥᖅᑳᕈᑕᐅᓪᓗᓂ ᑲᒪᒋᔭᒃᓴᕆᔭᐅᕗᖅ ᐱᔭᕆᐊᖃᖅᖢᓂ ᐃᓗᓕᖃᐅᑦᑎᐊᖅᑐᒥᒃ ᐊᐅᓚᑕᐅᑦᑎᐊᖅᑐᒥᒡᓗ ᑲᓴᒋᔭᐅᓂᕐᒥᒃ ᐱᓕᕆᐊᖑᓂᕐᒥᒡᓗ ᑕᒫᓂᓕᒫᖅ ᓄᓇᑦᑎᓐᓂ. ᑕᒪᓐᓇ ᐃᓚᓕᐅᔾᔨᓯᒪᔭᕆᐊᖃᖅᐳᖅ ᓄᓇᓕᖕᓂᒃ ᐅᖃᖃᑎᖃᕐᓂᕐᒥᒃ ᐃᓚᖃᕐᓗᓂᓗ ᓄᑕᖅᑲᑦ ᒪᒃᑯᒃᑐᓪᓗ ᓂᐱᖏᓐᓂᒃ, ᑕᒪᒃᑯᐊ ᐱᐅᙱᑦᑐᒃᑯᑦ ᐊᑐᖅᑕᐅᙱᓐᓇᖃᑦᑕᖅᑎᓪᓗᒋᑦ ᑕᒪᒃᑯᓄᖓ ᐋᖅᑭᒃᑕᐅᓯᒪᙱᑦᑐᓄᑦ ᐋᔾᔨᒌᙱᓐᓂᕆᔭᖏᓐᓄᑦ.

ᑭᐅᓯᓂᕐᒥᒃ ᒥᓂᔅᑕᐅᑉ ᐅᖃᐅᓯᕆᔭᖏᓐᓂᒃ ᐱᔾᔪᑕᐅᔪᓂᒡᓗ ᑖᖦᔅᓱᒧᖓ ᑲᑎᒪᓂᕆᔭᐅᔪᒧᑦ, ᑭᐅᓯᕗᒍᑦ ᐱᔪᓐᓇᕐᓂᖃᖅᑎᑕᐅᑦᑎᐊᖅᖢᑕ ᖃᐅᔨᓯᒪᓂᑦᑎᓐᓄᑦ. ᐱᔪᓐᓇᕐᓂᖃᕐᓂᕐᒧᑦ ᐃᓂᒋᔭᑦᑎᓐᓂ, ᖃᐅᑕᒫᑦ ᑐᓴᖅᐸᒃᐳᒍᑦ ᓄᓇᖃᖅᑳᖅᑐᓂᑦ ᓄᑕᖅᑲᓂᑦ, ᒪᒃᑯᒃᑐᓂᑦ ᐃᓚᖏᓐᓂᓪᓗ ᐊᑐᖃᑦᑕᖅᓯᒪᔭᖏᓐᓄᑦ ᑕᒪᑐᒪᓂ ᓄᑕᖅᑲᓂᒃ ᖃᓄᐃᙱᑦᑎᐊᖅᑎᑦᑎᔪᓐᓇᕐᓂᕐᒧᑦ ᐊᑐᖅᑕᐅᕙᒃᑐᒥ. ᓇᖏᖃᑎᒋᕙᕗᑦ ᓄᑕᖅᑲᑦ ᒪᒃᑯᒃᑐᓪᓗ, ᑕᐃᒪᓗᑐᖅ ᓂᐱᖏᑦ ᑐᓴᖅᑕᐅᓯᑲᐅᑎᒋᓂᐊᖅᐳᑦ. ᐃᓚᒋᔭᐅᓂᑦᑎᓐᓄᑦ CCCYA−ᒧᑦ ᐊᖏᖅᐳᒍᑦ ᐅᑯᓄᖓ:

1. ᐃᓕᓴᖅᓯᕗᒍᑦ ᑕᒪᒃᑯᐊ ᐊᐅᓚᑕᐅᑦᑎᐊᖅᑐᑦ ᐋᖅᑭᒃᓯᒪᓕᕈᑕᐅᕙᒃᑐᑦ ᑕᒪᐃᓐᓂᑦ ᒫᓐᓇᑲᐅᑎᒋ ᐊᕗᖓᑲᓪᓚᒡᓗ ᐱᓕᕆᐊᖑᓇᔭᖅᑐᓂᒃ ᐱᔭᐅᔭᕆᐊᖃᕐᓂᖏᓐᓂᒃ ᐱᐅᓯᒋᐊᖅᓯᑎᑦᑎᔪᒪᓪᓗᓂ ᐃᓅᓂᕐᒧᑦ ᖃᓅᓂᕆᔭᐅᕙᒃᑐᓂᒃ ᐃᓅᓯᑦᑎᐊᕆᒍᓐᓇᕐᓂᖏᓐᓄᓪᓗ ᓄᓇᖃᖅᑳᖅᑐᑦ ᐃᖅᑭᓖᑦ, ᐃᓄᐃᑦ, ᐊᓪᓚᖓᔪᓪᓗ ᓄᑕᖅᑲᑦ ᒪᒃᑯᒃᑐᓪᓗ ᑲᓇᑕᒥ. ᐱᖁᔨᕗᒍᑦ ᒫᓐᓇᑲᐅᑎᒋ ᐊᕗᖓᑲᓪᓚᒡᓗ ᐱᓕᕆᐊᖑᓇᔭᖅᑐᓂᒃ ᐱᓕᕆᕝᕕᖃᕈᒪᓂᕐᒧᑦ ᑭᒃᑯᑐᐃᓐᓇᓄᑦ ᐱᔾᔪᑕᐅᓕᖅᐸᒃᑐᓄᑦ ᖃᓄᐃᙱᑦᑐᓐᓇᕐᓂᕐᒧᑦ ᑕᒪᒃᑯᓄᖓ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᓚᒋᔭᐅᓗᓂ ᓈᒻᒪᒃᑐᓂᒃ ᐊᖏᕐᕋᖃᖅᑎᑦᑎᕙᖕᓂᖅ, ᐱᑕᖃᕈᓐᓃᖅᑎᑦᑎᓂᖅ ᐊᒃᖢᓗᐊᖅᐸᖕᓂᕐᒥᒃ, ᐱᐅᓯᒋᐊᖅᑎᑦᑎᓂᖅ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓂᒃ ᐊᑐᖅᑕᐅᔪᒃᓴᐅᑎᓂᒃ, ᓇᓗᙱᑦᑎᐊᕈᒪᓂᕐᒧᓪᓗ ᓴᓗᒪᔪᒥᒃ ᐃᒥᖃᕐᒪᖔᑕ ᓂᕿᖃᑦᑎᐊᖃᑦᑕᕋᓗᐊᕐᒪᖔᑕᓗ.

2. ᐱᓕᕆᐊᖃᓪᓚᕆᒍᒪᕗᒍᑦ ᑲᔪᓯᕙᓪᓕᐊᓂᐅᕙᒃᑐᒥᒃ ᐊᓯᔾᔨᖅᓯᓂᕐᒥᒃ ᐃᑲᔪᖅᑐᐃᓂᐊᖅᑐᒥᒃ ᐋᖅᑭᒋᐊᕈᑎᖃᕐᓂᕐᒥᒃ.

3. ᐅᒃᐱᕆᔭᖃᖅᐳᒍᑦ ᓂᐱᖏᑦ ᓄᑕᖅᑲᑦ ᒪᒃᑯᒃᑐᓪᓗ ᐃᓚᒋᔭᐅᓪᓚᕆᖕᓂᖏᓐᓂᒃ ᖃᓄᑐᐃᓐᓇᖅ ᑲᔪᓯᓂᕆᔭᐅᔪᒧᑦ ᐋᖅᑭᒃᓱᖅᑕᐅᓯᒪᔪᒧᑦ ᐃᓅᓯᖏᓐᓂᒃ ᐱᐅᓯᒋᐊᖅᑎᑦᑎᓇᔭᕐᓂᕐᒥᒃ.

4. ᐅᒃᐱᕆᔭᖃᖅᐳᒍᑦ ᑕᒪᒃᑯᐊ ᓄᓇᖃᖅᑳᖅᑐᑦ ᐃᓄᐃᑦ ᐱᔪᓐᓇᐅᑎᖃᓪᓚᕆᖕᓂᖏᓐᓂᒃ ᓇᖕᒥᓂᖅᓱᓕᕈᓐᓇᕐᓂᕐᒥᒃ, ᐃᓚᒋᔭᐅᓪᓗᓂ ᐱᔪᓐᓇᐅᑎᖃᕐᓂᖅ ᑲᒪᒋᔭᖃᕐᓂᐊᕐᓗᓂ ᓄᑕᖅᑲᒥᓂᒃ

5. CCCYA-ᒋᔭᐅᔪᖅ ᓇᓗᓇᐃᖅᓯᓚᐅᖅᑎᓪᓗᒍ ᐅᖃᓪᓚᕆᖕᓂᑦᑎᓐᓂ ᐋᖅᑭᒋᐊᕈᑎᖃᕐᓂᕐᒥᒃ ᐅᕙᓂ, ᓱᓕᓂᕐᒧᑦ ᐋᖅᑭᒋᐊᕈᑎᖃᕐᓂᕐᒧᓪᓗ ᑲᒥᓴᒋᔭᐅᔫᑉ ᒪᑐᓕᖅᑎᓪᓗᒍ ᐱᓕᕆᐊᕆᔭᖏᓐᓂᒃ ᔫᓂ 2015−ᒥ, ᐅᖃᖅᐳᒍᑦ ᐊᑐᓕᖅᑎᑕᐅᖁᓪᓗᒍ TRC−ᑯᑦ ᐅᖃᐅᓯᕆᔭᖏᓐᓂᒃ ᐱᓕᕆᖁᔨᓪᓗᑎᒃ. ᓇᓗᓇᐃᖅᓯᕗᒍᑦ ᖃᐅᔨᒪᓂᑦᑎᓐᓂᒃ ᐱᐅᙱᑦᑐᒃᑯᑦ ᐊᒃᑐᖅᓯᓯᒪᓂᖓᓂᒃ ᐃᓚᓕᐅᔾᔨᓇᓱᒃᑎᑦᑎᕙᖕᓂᖅ ᐊᐅᖃᑎᒋᙱᑕᓄᑦ, ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, 60s Scoop−ᖑᓂᕋᖅᑕᐅᔪᒥᒃ ᒫᓐᓇᓗ ᓄᑕᖅᑲᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐊᑐᖅᑕᐅᕙᒃᑐᖅ ᖃᓄᐃᓕᑎᑦᑎᓯᒪᖕᒪᖔᑕ ᓄᓇᖃᖅᑳᖅᑐᓂᒃ, ᐃᓄᖕᓂᒃ ᐊᓪᓚᖓᔪᓂᒡᓗ ᓄᑕᖅᑲᓂᒃ ᒪᒃᑯᒃᑐᓂᒡᓗ.

6. ᐅᒃᐱᕆᔭᖃᖅᐳᒍᑦ ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᑲᑎᒪᓂᕆᕙᒃᑕᖓᑦ ᐱᔪᓐᓇᐅᑎᖏᓐᓄᑦ ᓄᑕᕋᐅᑉ ᐱᒋᐊᕐᕕᐅᕙᖕᓂᖓᓂᒃ ᑕᒪᐃᓐᓄᑦᑎᐊᖅ ᓄᑕᖅᑲᑦ ᐱᔪᓐᓇᐅᑎᒋᔭᖏᓐᓄᑦ. ᐊᑐᓕᖅᑎᑕᐅᓂᖓᓗ ᑐᓴᐅᒪᑎᑕᐅᔭᕆᐊᖃᖅᐳᖅ ᐆᒪᙵᑦ, ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᐅᖃᓪᓚᕆᒃᑕᖓᑦ ᐱᔪᓐᓇᐅᑎᒋᔭᖏᓐᓄᑦ ᓄᓇᖃᖅᑳᖅᑐᑦ.

###

ᐱᔾᔪᑎᒋᓪᓗᒋᑦ ᑲᓇᑕᒥᐅᓄ ᑲᑎᒪᔩᑦ ᓄᑕᖅᑲᓐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᒋᔭᐅᔪᑦ

ᑲᓇᑕᒥᐅᓄᑦ ᑲᑎᒪᔩᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᓪᓗᑎᒃ ᑲᑐᔾᔨᖃᑎᒌᖑᕗᑦ ᒪᓕᒐᑎᒍᑦ ᑎᓕᔭᐅᓯᒪᓪᓗᑎᒃ ᑭᒡᒐᖅᑐᐃᔨᐅᓪᓗᑎᒃ ᐱᔪᓐᓇᐅᑎᒋᔭᐅᔪᓄᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ. ᑕᒪᒃᑯᐊ ᑭᒡᒐᖅᑐᖅᑏᑦ ᐊᐅᓚᑐᐃᓐᓇᕆᐊᖃᖅᐳᑦ ᐊᔾᔨᒌᙱᑦᑐᑎᒍᑦ ᑕᐃᔭᐅᕙᒃᑐᑎᒍᑦ (ᓲᕐᓗ ᐃᒪᓐᓇ,−ᑭᐅᓯᔨ ᑭᒡᒐᖅᑐᐃᔨ,ᐱᓕᕆᖃᑎᖃᖅᑎ, ᑲᒥᓯᓇ) ᑭᓯᐊᓂ ᑕᒪᕐᒥᑦᑎᐊᖅ ᑭᒡᒐᖅᑐᖅᑎᓪᓚᕆᒋᔭᐅᕗᑦ ᐅᖃᐅᓯᐅᓯᒪᔪᓂ ᐊᕕᒃᓯᒪᓂᕆᔭᐅᔪᓂ ᐅᑭᐅᖅᑕᖅᑐᒥᓗ ᐊᕕᒃᓯᒪᓂᕐᓂ. ᑕᒪᕐᒥᑦᑎᐊᖅ CCCYA−ᒧᑦ ᐃᓚᒋᔭᐅᔪᑦ ᐃᓛᒃᑰᖅᖢᑎᒃ ᐱᓕᕆᔨᓪᓚᕆᐅᓪᓗᑎᒃ ᐅᖃᕐᕕᖃᑲᐅᑎᒋᕙᒃᖢᑎᒃ ᒪᓕᒐᓕᐅᕐᕕᖕᒥᐅᓄᑦ ᐱᓕᕆᕝᕕᒋᔪᓐᓇᖅᑕᒥᓂ ᐃᓂᒥᓂᒃ ᐱᔾᔪᑎᖃᕐᓗᑎᒃ. ᑕᒪᕐᒥᒃ ᐊᑐᓂᑦ CCCYA−ᒧᑦ ᐃᓚᒋᔭᐅᔪᓄᑦ ᑎᑎᕐᕕᒋᔭᐅᔪᖅ ᐋᖅᑭᒃᑕᐅᓯᒪᕗᖅ ᐱᖁᔭᑎᒍᑦ ᐊᐅᓚᓂᐊᕐᓗᑎᒃ ᐃᓛᒃᑰᕐᓗᑎᒃ ᒐᕙᒪᒃᑯᑦ ᐱᔪᓐᓇᐅᑎᒋᔭᖏᓐᓂᑦ ᐊᐅᓚᑕᖏᓐᓃᓪᓘᓐᓃᑦ. ᑲᑎᒪᔨᒋᔭᐅᔪᑦ ᐃᓚᖃᖅᐳᑦ ᐃᓚᒋᔭᐅᔪᓂᒃ 9-ᓂᑦ ᐊᕕᒃᓯᒪᓂᕆᔭᐅᔪᓂᑦ ᒪᕐᕉᖕᓂᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᓂᑦ ᐅᑯᓇᓂ, ᐋᓪᐴᑕ, ᕈᐳᕆᑎᔅ ᑲᓚᒻᐱᐊ, ᒪᓂᑑᐸ, ᓂᐅ ᐳᕋᓐᔅᐅᐃ, ᓂᐅᕙᐅᓐᓛᓐᑦ, ᐊᒻᒪᓗ ᓛᐸᑐᐊ, ᓅᕙ ᒡᑰᓯᐊ, ᓄᓇᕗᑦ, ᐊᓐᑎᐅᕆᐅ, ᑯᐃᐸᒃ, ᓇᔅᑳᑦᓱᐊᓐ ᐊᒻᒪᓗ ᔫᑳᓐ.