Hanahimayuq-Nunavunmi inmingnik-kivgaqtuiyut katimaviat ilihaivaktuq inuuhuktunik Nunavunmiunik “Nipiqquqtuhilutik Nipliriamik”


TUHAAYAGHAT HAILIYAUHIMAYUT
Tuhaqtinnariqtughat

January 25-mi 2018

Iqaluit, NU – Havangnaqtillugu, Uqaqtighaat Nutaqqat Inulrammiillu Havakviat (RCYO) aullaqtittinahuat taapkuninnga hanahimayunik-Nunavunmi, inmingnik-kivgaqtuiyunik katimavighaanik, “Nipiqquqtuhilutit Nipliqlutit”, ilihaqtunut talvani Aqsarniit Ilihaqvianit Iqalungni.

“Katimavianit ilihaiyumayut nutaqqanik inulramminiklu pilaarutainik munaqtaghainiklu ikayurahuaqhugit aklittiqhutik kamahuktailiniqmiklu inmingnik-kivgaqtuiyut ayuitaghainnik”, uqaqtuq Uqaqtighaat Nutaqqat Inulrammiillu, Sherry McNeil-Mulak. “Katimavighaat parnaiyaqtauhimayuq havakvianit inulrammiit Nunavunmiut ihumagiplugit. Katimavighaanit ilihaiyumayugut alianaqtunik, qauhittiarnaqtunik ilihimayaptikkullu taimaa ilihaqtut ilitturiyaamik ikayuqtighainik ilauquplugillu hulilukaaqlutik,” uqaqtuq NcNeil-Mulak.

Uplumimut, katimapkaivaktut 244-nik ilihaqtunik 6-iuyunit nunallaaqnit aviktuqhimayumi tamaat taapkualu RCYO-kut katimapkaivagumayut ilihaqtunik, ilihaqtunik Grade 7-mit 12-mut. December 2017-mi, tamangnik ilihaqtut Grade 8-mi talvani ilihaqvingmi katimaqatauyut, tajjalu havangnaqmi katimapkainahuat tamangnik ilihaqtunik Grade 7-mi.

“Nutaqqat pilaarutait aghuurnariyaqqut,” uqaqtuq James Rankin, Ilihaqtut Ikayuqtia Ilihaiyi talvani Aqsarniit Ilihaqvianit. “Ihumayunga taimaa aghuurnaqtuq ilihaqtunut ilihaqvingmi ilauyaami katimayunut taimaa qanurunaaqhimaittumik kivgaqtuivangniat inmingnik iharianaqhikpat. Ayuiqhaiyaami hapkuninnga aghuurnaqtuq taapkua ilihaqtut aturaaqtaghaat inuuhiinit.”

Naunaittiarumaguffi katimavighanut takulugu uiguanguyuq naunaitkutaq. Tuhaqtittiyit qaitquyauyullu January 25-mi katimayunit Aqsarniit Ilihaqvianit 12:45-mit 2-mut upluummaat. Parnaiyaihimalutit qainarirahuaqluhi katimavighanut apiqhuiyunut RCYO-kullu, ilihaqvingnit, ilihaqtuniklu.

###

Naunaittiarumaguffi:

Kim Foster
Atannguyaq Tuhaqtittiyinut Inungniklu Ilitturipkainiqmik
Uqaqtighaat Nutaqqat Inulrammiillu Havakviat
867-975-5091 | kfoster@rcynu.ca