ᐅᖃᐅᓯᖅ ᑭᒡᒐᖅᑐᐃᔨᒥ ᐱᔾᔪᑎᖓ: ᓄᓇᕗᒻᒥ ᐃᖅᑲᖅᑐᐃᕕᒻᒥ ᖁᑦᓯᓂᖅᓴᒧᑦ ᐅᓐᓂᕐᓗᓐᓂᕐᒧᑦ ᐃᓱᒪᓕᐊᖑᔪᖅ


ᓄᕕᐱᕆ 16, 2020

ᐅᖃᐅᓯᖅ ᑭᒡᒐᖅᑐᐃᔨᒥ ᐱᔾᔪᑎᖓ: ᓄᓇᕗᒻᒥ ᐃᖅᑲᖅᑐᐃᕕᒻᒥ ᖁᑦᓯᓂᖅᓴᒧᑦ ᐅᓐᓂᕐᓗᓐᓂᕐᒧᑦ ᐃᓱᒪᓕᐊᖑᔪᖅ

ᐊᐃᖓᐃ ᓄᓇᕗᒻᒥᐅᑦ:

ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ ᐱᓕᕆᖃᑦᑕᖅᐳᑦ ᓄᓇᕗᑦ ᒐᕙᒪᒃᑯᑦ ᐱᔨᑦᑎᕋᐅᑎᖏᑦ ᐋᖅᑭᐅᒪᑦᑎᐊᖁᓪᓗᒋᑦ, ᐊᔾᔨᒌᒃᑎᑦᑎᓗᑎᒃ, ᒪᓕᑦᑎᐊᕐᓗᑎᒡᓗ ᒪᒃᑯᑦᑐᑦ ᓄᓇᕗᒻᒥᐅᑦ ᐱᔭᕆᐊᓕᖏᓐᓂᒃ ᒪᓕᒃᑐᓂᒃ ᐊᒻᒪ ᐃᑲᔪᖅᑐᐃᓗᑎᒃ ᒪᒃᑯᒃᑐᑦ ᐱᔪᓐᓇᐅᑎᖏᓐᓂᒃ, ᖃᑕᙳᑎᖏᑕᓗ, ᑕᑎᒋᔭᖏᓐᓄᑦ. ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ ᑭᒃᑯᑐᐃᓐᓇᓄᑦ ᑕᑎᒋᔭᐅᔪᓐᓇᖅᐳᑦ, ᐅᖃᐅᓯᖃᕈᒪᕗᖓ ᓇᓗᓇᐃᖅᑕᐅᓯᒪᔪᒥᒃ ᐱᔾᔪᑎᖓᓂᒃ ᓄᓇᕗᒻᒥ ᐊᔪᐃᓐᓇᕆᐊᕐᕕᖕᒥ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᕈᑕᐅᔪᖅ ᖃᓄᐃᓕᔭᐅᓂᖓ ᐊᓈᓇᒋᔭᐅᔪᖅ ᐸᓯᔭᒃᓴᐅᓂᕋᖅᑕᐅᓪᓗᓂ ᕿᑐᕐᙵᒥᓂᒃ ᑕᓪᓕᒪᓂᒃ ᐅᑭᐅᓕᖕᒥᒃ "ᐋᓐᓂᖅᓯᕆᕐᔪᐊᕐᓂᖓᓄᑦ".

ᐃᓄᓕᕆᔨᒃᑯᑦ ᐱᓕᕆᐊᒃᓴᖃᖅᐳᑦ ᓴᐳᔾᔨᓯᒪᓗᑎᒃ ᐊᒻᒪ ᑲᒪᒋᔭᐅᑎᑦᑎᑦᑎᐊᕐᓗᑎᒃ ᓄᑕᖅᑲᓂᒃ ᒪᒃᑯᒃᑐᓂᓪᓗ ᓄᓇᕗᒻᒥ. ᐱᓕᕆᕝᕕᒋᔭᖓ ᑲᔪᓯᑦᑎᐊᙱᐳᑦ ᓄᑕᖅᑲᓄᑦ ᖃᑕᙳᑎᖏᓐᓄᓪᓗ. ᐊᔪᐃᓐᓇᕆᐊᕐᕕᖕᒥ ᐃᖅᑲᖅᑐᐃᕕᒃᑯᑦ ᐅᖃᐅᓯᒃᓴᖏᑦ "ᓂᑲᓪᓗᖓᓐᓇᖅᑐᖅ" ᑎᒍᐊᙳᐊᖑᔪᓄᑦ, ᐱᒋᐊᖅᑎᑦᑎᖁᔨᕗᑦ ᐱᓕᕆᔾᔪᓯᖓ ᑲᒪᒋᔭᐅᑲᐅᑎᒋᖁᓪᓗᒍ, ᓄᓇᕗᒻᒥᐅᓕᒫᓄᑦ ᐱᓕᕆᐊᒃᓴᖏᓐᓂᒃ ᑲᔪᓯᑎᑦᑎᙱᒻᒪᑕ ᑖᒃᑯᓂᖓ ᐱᔨᑦᑎᕋᐅᑎᓂᒃ ᐊᑐᖃᑦᑕᖅᑐᓂᒃ.  

ᐊᔪᐃᓐᓇᕆᐊᕐᕕᖕᒥ ᐃᖅᑲᖅᑐᐃᕕᒃᑯᑦ ᐃᓱᒪᓕᐅᕈᑕᐅᔪᑦ ᓇᓗᓇᐃᖅᓯᒃᑲᓐᓂᖅᐳᑦ ᐅᓄᖅᑐᓂᒃ ᐃᓱᒫᓘᑕᐅᔪᓂᒃ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓᓂ ᐃᓄᓕᕆᔨᒃᑯᑦ ᒥᒃᓵᓄᑦ. ᐅᖃᐱᓘᑕᐅᔪᑦ ᑲᒪᒋᓂᐊᕐᓗᒋᑦ ᐅᕙᑦᑎᓐᓄᑦ ᑐᓴᖅᑎᑦᑎᔾᔪᑕᐅᔪᑦ ᐱᓕᕆᕝᕕᒋᔭᐅᔪᖅ ᐱᔾᔪᑎᒋᓪᓗᒍ, ᑕᑯᐃᓐᓇᖃᑦᑕᖅᐳᒍᑦ ᓵᑕᐅᔪᓐᓇᑦᑎᐊᙱᓐᓂᖏᓐᓂᒃ ᐊᒻᒪ ᒪᓕᑦᑎᐊᙱᓐᓂᖏᓐᓂᒃ. 2019-2020−ᒥ ᐊᕐᕌᒍᑕᒫᖅᓯᐅᑦ ᐅᓂᒃᑳᖓ, ᓴᖅᑭᑕᐅᓚᐅᖅᓯᒪᔪᖅ ᒪᓕᒐᓕᐅᕐᕕᖕᒥ ᓯᑎᐱᕆ 21, 2020-ᒥᑦ, ᑖᓐᓇ ᐱᔾᔪᑎᒋᓪᓗᒍ ᐅᖃᐅᓯᕆᕙᕋ.

ᐱᓯᒪᓕᖅᑎᓪᓗᑕ ᑎᑎᕋᖅᓯᒪᔪᓂᑦ ᐋᓐᓂᖅᑕᐅᕐᔪᐊᖅᑐᕕᓂᕐᓂᑦ ᐊᒻᒪᓗ ᐃᓅᔪᓐᓃᖅᑐᕕᓂᕐᓂᑦ ᒪᒃᑯᑦᑐᓂᑦ ᐊᕐᕌᒍᓐᓂ ᑕᓪᓕᒪᓂᑦ ᖄᖏᖅᑐᓂᑦ ᐃᓄᓕᕆᔨᒃᑯᓐᓂᙶᖅᑐᓂᑦ, ᖁᐊᖅᓵᕈᑎᖃᓚᐅᖅᑐᖓ ᐊᑯᓚᐃᑦᑕᕐᓂᖓᓂᑦ ᐋᓐᓂᖅᑎᕆᕙᒃᑐᓂᓪᓗ ᑎᒥᒃᑯᓪᓗ ᐊᒻᒪᓗ ᖁᓄᔪᕐᓂᐊᕐᓂᕐᒧᑦ ᓇᓗᓇᐃᖅᑕᐅᔪᓂᑦ. ᐊᔾᔨᖓᓂᑦᑕᐅᖅ ᑲᒪᓇᒻᒪᕆᒃᑐᖅ ᑖᒃᑯᐊ ᖃᓄᐃᓕᐅᕐᓂᐅᕙᒃᑐᑦ ᐃᓄᓕᕆᔨᒃᑯᓐᓂ ᑭᐅᔭᐅᑦᑎᐊᖃᑦᑕᖅᓯᒪᙱᒻᒪᑕ...ᓱᓕᒃᑲᓐᓂᖅ, ᑎᑎᕋᖅᑕᐅᓯᒪᔪᑦ ᐱᓚᐅᖅᑕᒃᑲ ᐱᐊᓂᒃᓯᒪᙱᑉᐳᑦ ᓲᖃᐃᒻᒪ...ᐃᓄᓕᕆᔨᒃᑯᑦ ᐅᖃᓚᐅᕐᒪᑕ ᑖᒃᑯᐊ ᖃᓄᐃᓐᓂᐅᕙᒃᑐᑦ ᓇᐅᑦᑎᖅᓱᖅᑕᐅᑦᑎᐊᖃᑦᑕᖅᓯᒪᙱᒻᒪᑕ. 

ᐅᓄᖅᑐᓂᒃ ᐃᓱᒫᓘᑎᒋᔭᕐᓂᑦ ᒥᓂᔅᑕᐅᑉ ᑐᒡᓕᐊᓄᑦ ᑐᓴᖅᑎᑦᑎᓯᒪᓕᖅᐳᖓ ᐃᓄᓕᕆᔨᒃᑯᓐᓄᑦ' ᑐᕌᖅᑐᓂᒃ ᐊᒥᓱᐃᖅᓱᖅᖢᖓ.  ᐱᕕᖃᕈᒪᕗᖓ ᓇᓗᓇᐃᖅᓯᔪᒪᓪᓗᖓ ᓄᓇᕗᒻᒥᐅᓕᒫᑦ ᐃᓱᒫᓘᑎᒋᔭᕐᓂᑦ ᑐᓴᐅᒪᑦᑎᐊᖁᓪᓗᒋᑦ ᖃᓄᐃᓕᐅᕈᑎᖏᓐᓂᒡᓗ ᑭᒡᒐᖅᑐᐃᔨᑦ ᒪᒃᑯᒃᑐᓄᑦ ᓄᑕᖅᑲᓄᓪᓗ ᑎᑎᕋᕐᕕᖓᓂ ᒐᕙᒪᒃᑯᓐᓂ ᓵᑕᒃᓴᐅᓂᕋᐃᕗᑦ ᐱᔨᑦᑎᕋᐅᑎᖏᓪᓗ ᐱᐅᓯᒋᐊᕆᐊᖃᖅᖢᑎᒃ. ᑎᑎᕋᕐᕕᒃᐳᑦ ᒫᓐᓇ ᕿᒥᕐᕈᑎᑦᑎᕗᑦ ᓄᑕᖅᑲᑦ ᑲᒪᒋᔭᐅᑦᑎᐊᕐᓂᖏᓐᓄᑦ ᐱᔨᑦᑎᕋᐅᑎᖏᓐᓂᒃ ᐃᓄᓕᕆᔨᒃᑯᓐᓂ ᐊᑐᐃᓐᓇᐅᑎᑕᐅᕙᒃᑐᑦ, ᑭᒡᒐᖅᑐᐃᔨᑦᑎᓐᓂ ᐱᓕᕆᐊᖑᓚᐅᖅᑐᑦ ᒪᓕᒃᖢᒋᑦ. ᓱᓕᒃᑲᓐᓂᖅ, ᑭᒡᒐᖅᑐᐃᔨ ᒪᒃᑯᒃᑐᓄᑦ ᓄᑕᖅᑲᓄᓪᓗ ᑎᑎᕋᕐᕕᖓ ᒫᓐᓇ ᐋᖅᑭᒃᓱᐃᔪᑦ ᕿᒥᕐᕈᔭᒥᓂᒃ ᐋᓐᓂᕐᔪᐊᖅᓯᒪᔪᓂᒃ ᐊᒻᒪ ᐃᓅᔪᓐᓃᖅᓯᒪᔪᓂᒃ ᐱᓕᕆᐊᖑᔪᒥᑦ.

ᐃᓄᓕᕆᔨᒃᑯᓐᓂ ᐅᖃᐅᓯᐅᓚᐅᖅᑐᖅ, "ᓯᑎᐱᕆ 30, 2015, ᐊᒻᒪ ᒫᑦᓯ 31, 2020 ᐊᑯᓐᓂᖓᓂ, 556 ᐋᓐᓂᕐᔪᐊᓚᐅᖅᐳᑦ ᐃᓅᔪᓐᓃᖅᑐᖃᖅᖢᓂᓗ ᒪᒃᑯᒃᑐᓂᑦ ᓄᓇᕗᒻᒥᐅᓂᑦ ᐱᔨᑦᑎᕋᖅᑕᐅᓪᓗᑎᒃ ᑐᑭᒧᐊᒃᑎᑦᑎᔨᒧᑦ ᓄᑕᖅᑲᓄᑦ ᐃᓚᒌᓄᓪᓗ ᐱᔨᑦᑎᕋᖅᑎᒃᑯᓐᓄᑦ. ᑐᑭᒧᐊᑦᑎᑦᑎᔨ ᓄᑕᖅᑲᓄᑦ ᐃᓚᒌᓄᓪᓗ ᐱᔨᑦᑎᕋᖅᑎᓄᑦ ᓇᓗᓇᐃᖅᓯᒃᑲᓐᓂᓚᐅᖅᐳᖅ "ᐱᑕᖃᑦᑎᐊᙱᓗᐊᓚᐅᖅᐳᑦ ᑎᑎᕋᖅᑕᐅᓯᒪᔪᑦ, ᖃᐅᔨᓴᕈᑕᐅᔪᑦ ᐅᓂᒃᑲᐅᓯᐅᔪᓪᓗ ᑖᒃᑯᐊ ᐋᓐᓂᖅᑐᕕᓃᑦ", ᐅᓄᕐᓂᖏᑦ ᑕᒻᒪᖓᙱᑦᑐᑦ ᐅᓄᕐᓂᖅᓴᐅᓇᔭᖅᐳᑦ.

ᐱᓕᕆᐊᖑᔪᒥᑦ ᑲᒪᒋᔭᖃᕐᓂᐊᖅᑐᑦ  ᖃᐅᔨᓴᖅᐸᒡᓗᓂ ᖃᓄᐃᑦᑐᖃᖅᑎᓪᓗᒍ ᐊᑦᑕᕐᓇᕐᑐᒥᑦ ᐋᓐᓂᕐᔪᐊᕈᑕᐅᔪᒥᑦ ᐃᓅᔪᓐᓃᖅᑐᖃᕐᓗᓂᓘᓐᓃᑦ ᒪᒃᑯᑦᑐᒥᒃ(ᓂᒃ), ᑐᑭᓯᓇᓱᒡᓗᑎᒃ ᓄᓇᕗᑦ ᒐᕙᒪᖓᓂ ᐱᔨᑦᑎᕋᖅᑕᐅᓚᐅᕐᒪᖔᑕ ᐱᔪᓐᓇᖅᑕᖏᓐᓂᑦ ᑖᒃᑯᐊᓗ ᐱᔨᑦᑎᕋᐅᑏᑦ ᐊᑑᑎᖃᕐᒪᖔᑕ ᐱᔭᕆᐊᓕᖏᓐᓂᒃ. ᐊᑐᖅᑕᐅᔪᓂᑦ ᖃᐅᔨᓴᕈᓐᓇᖅᑎᑦᑎᓂᐊᖅᐳᑦ, ᓲᕐᓗ ᐊᑐᖅᑕᐅᓚᐅᖅᑐᒥᒃ ᑕᓪᓕᒪᓂᒃ ᐅᑭᐅᓕᖕᒥᒃ ᓄᑕᕋᒥᒃ ᐃᖅᑲᖅᑐᐃᕕᖕᒥ ᐃᓱᒪᓕᐅᕈᑕᐅᔪᒥᒃ. ᑖᒃᑯᓂᖓ ᕿᒥᕐᕈᑎᑦᑎᕗᑦ ᐱᒃᑲᖅᑎᑦᑎᔪᒪᙱᖦᖢᑎᒃ, ᐃᒪᓐᓇᖔᕐᓕ ᐊᓯᔾᔩᖁᔨᓪᓗᑎᒃ ᒪᓕᒐᖏᓐᓂᒃ, ᐊᑐᐊᒐᖏᓐᓂᒃ, ᐱᓕᕆᔾᔪᓯᖏᓐᓂᒃ, ᐱᓕᕆᐊᖏᓐᓂᒃ, ᐊᒻᒪ ᐱᔨᑦᑎᕋᐅᑎᖏᓐᓂᒃ ᑕᐃᒪᓐᓇ ᐋᓐᓂᖅᑕᐅᔪᖃᒃᑲᓐᓂᖁᓇᒍ ᐅᕝᕙᓘᓐᓃᑦ ᐃᓅᔪᓐᓂᖅᑐᖃᖁᓇᒍ ᓯᕗᓂᒃᓴᑦᑎᓐᓂ. ᐱᓕᕆᐊᖑᔪᖅ ᐊᑐᕐᓗᒍ, ᑎᑎᕋᕐᕕᒃᐳᑦ ᕿᒥᕐᕈᔪᓐᓇᕐᓂᐊᖅᐳᑦ ᖃᓄᐃᓕᐅᕐᓂᐅᔪᓂᑦ ᐊᒻᒪ ᐃᓱᒪᓕᐅᕈᑕᐅᔪᓂᑦ ᐃᓄᓕᕆᔨᒃᑯᓐᓂ ᐋᖅᑭᒃᑕᐅᔪᓂᒃ, ᐊᓯᖏᓐᓂᒡᓘᓐᓃᑦ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ, ᑐᑭᓯᓇᓱᒡᓗᑎᒃ ᐃᑲᔫᑎᖃᓚᐅᕐᒪᖔᑕ ᐅᕝᕙᓘᓐᓃᑦ ᓄᖅᑲᖅᑎᑦᑎᔪᓐᓇᓚᐅᕐᒪᖔᑕ ᐃᓅᔪᓐᓃᖅᑐᖃᙱᓪᓗᓂᓘᓐᓃᑦ.

ᓄᓇᕗᑦ ᒐᕙᒪᒃᑯᑦ ᑲᒪᒋᔭᒃᓴᒥᓂᒃ ᖃᐅᔨᒪᔭᕆᐊᖃᖅᐳᑦ ᒪᒃᑯᒃᑐᑦ ᐱᔪᓐᓇᐅᑎᖏᓐᓂᒃ ᑲᔪᓯᑎᑕᐅᖁᓪᓗᒋᑦ ᓄᓇᕐᔪᐊᕐᒥ ᑲᑎᒪᕐᔪᐊᖅᑐᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐱᔾᔪᑕᐅᓪᓗᑎᒃ, ᑕᐃᒪᐃᑦᑐᖃᖅᑎᓪᓗᒍ, ᐱᓗᐊᖅᑐᒥ:

ᐃᓛᒃᑰᖅᑐᖅ 19: ᓴᐳᔾᔭᐅᓯᒪᔪᓐᓇᕐᓂᖅ ᖃᓄᐃᑦᑐᑐᐃᓐᓇᓂᑦ ᐋᓂᖅᓯᖅᑕᐅᕙᒃᑐᓂᑦ ᑲᒪᑦᑎᐊᙱᑦᑐᓂᓪᓗ;
ᐃᓛᒃᑰᖅᑐᖅ 20: ᓴᐳᔾᔭᐅᓯᒪᔪᓐᓇᕐᓂᖅ ᐊᖓᔪᖅᑳᔅᓯᓐᓃᑦᑐᓐᓇᙱᒃᑯᕕᑦ; ᐊᒻᒪ
ᐃᓛᒃᑰᖅᑐᖅ 20: ᓴᐳᔾᔭᐅᓯᒪᔪᓐᓇᕐᓂᖅ ᑎᒍᐊᖅᑕᐅᓯᒪᒍᕕᑦ.

ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓᓂ ᐱᓕᕆᐊᒃᓴᖃᖅᐳᑦ ᑭᒃᑯᑐᐃᓐᓇᓂᓪᓗ ᓄᓇᕗᑦ ᒐᕙᒪᒃᑯᑦ ᓵᑕᒃᓴᐅᔪᓐᓇᖅᐳᑦ ᐱᔭᕆᐊᓕᑦᑎᓐᓂᒃ ᐱᔨᑦᑎᕋᕈᓐᓇᕐᓗᑎᒃ. ᐱᐅᓂᖅᓴᒥᒃ ᐱᔪᒪᔭᕆᐊᖃᖅᑐᒍᑦ.


ᐅᕙᙶᖅᑐᖅ,

ᔭᐃᓐ ᐸᐃᑦᔅ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨ