Apiqutiqaqtuq


Apiqhuutaulluaqpaktut ikayuutigittaaktatit apiqhuutingnut havakviptingnut.

Hunat pivakpait havagviffingni?

Havakvikput ikayuqpagait inulrammiit pilaarutikhainuttaimaalu Nunavut Kavamanga ikayuqtillugit tammaqtaililugillu ukuninga pilaarutikhainut.  

Atauhiq pivaktakkut inungmut ikayuutikhainut.Kangiqhidjutaa taimaa havaqatigilugu inulrammiik avaliittumik havaqatigilugu. Taimaa pittaaqtugut:

  • ilingnut tunihittaaqtugut pilaarutikhangnik
  • ikayuqlutit /ilangniklu paqittiyaaffingni havakpagainik havaktauyakhainiklu piumayangnik
  • ikayuqlutit qanuq kangiqhipkaiyaangni piumayangnik aallanut
  • ilaupkaklutit ihumaliurutikhanik ilingnut pihimayunut
  • katimaqatigilutit munaqhilu, ayurhaqtunut ikayuqti, nunallaami itiktauhimavaktunut havakti, aallanullu kavamatkuni havaktiuyumut

Qanuq ikayuutivut pidjutauniaqtuq piumayangnut uvaptingnullu uqaqtangnut!

Hunat nutaqqanut pilaarutikhat?

Nutaqqanut pilaarutikhat hunavaluit piyakhariyatit pittaaqtarillu nakuuyumik inuuhiudjutiqariami. Nutaqqat nunakyuami pidjutikhalgit ukununga – arnat angutilluunniit, nunagiyainut, angaadjutinut itquumagiyait kinauyaakhamingnullu pitquhirmingni.

Taimaatut, pilaarutiti ukununga:

  • nakuuyut niqikhat
  • qayangnaittumik nayurvikhaq
  • inuuhiqaqluni ningaqhirnaittumik
  • pitquhiriyangnik
  • munariyaulutit, qanuqlikaak, angayuqqaangnit
  • uqarumayangnik uqaqlutit inirniit naalaktillugillu

Hunat pidutikhat uqaqvigiyaamni talvunga RCY-kut havagvianut?

Amihuuyut pidjutikhat huuq ilivit uqaqvigidjutikhangnut havakviptingnut:

  • Munaruyaungittutit kavamatkunit ikayuqhirumayutillu uqariangni ayurhaqtunut ikayuqtimut ilagiiktunit pulaaqtukhanut.
  • Uqarumaguvit ihumaaluutingnik aanniarutingnut taaffumunga ihumaaluktunut uqaudjiuyumut, munaqhinut aallanullu.
  • Aallanik ikayuutikhaqarumaguvit taimaa FANS-nut pidjutait ayuqhautigigungni piumayangnut.
  •  Ilihimangitkuvit kitumik kavamatkuni havagvingmit, havaktauyamulluunniit ikayuutigittaaqtangnut.

Ilihimangitkugit ikayuqtaaptingnut, uqaqvigiluta. Ikayulimaitkupta, naunaikhiniaqtugut inungmik ikayuqtaaqtumik.

Ihumaaluutigiyatka ilatka, ikayuqtaaqqit?

Pilaarutikhaqaqtutit nayuriangni inuuhittiarhutik ilagiiktuni ilingnik ikayuqpaktunut taimaalui kavamatkut havaaqaqtumik ikayuqhutik ilagiiktunik. Ikayuutikhalik ilingnut ilangnullu. Naalaktaaqtavut ihumaaluutingnik. Ikayuqtaaqtugut ilingnik ilangnullu piyaaffingni havaktauyakhanik havakpagainiklu piumayangnut. Katimakatigittaaqtaffi katimayuniitkuvit, ilangnut kavamatkuni havatimullu uvaptingnut apiqhiguvit.

Nutarauyunga. Havagvingnut hivayaktaaqqik?

Kinalikaak uvaptingnut hivayaktaaqtut. Inirnimut uvaptingnut hivayaktittaaqtatut.   

Inuit aallat ilihimaniaqqat ilingnut hivayaruma?

Aallanut hiamitipkailimaittugut. Aallanut naunaitkutinigiyangnut tunihilimaittugut angiruvit kihimi pittaaqtugut. Kihimi,ilaani pidjutikhalik uqaqtughauvluta ilanginnik ilvit unnirtangnut. Ukuninga:

  • uvaptingnut uqaruvit inuk aallaluunniit ayuqhautiqaqpiakkata qayangnaqtumik
  • uvaptingnut uqaruvit inuk aalla ilvilluuniit qilamik ikayuqtaugumakpata

Uqaqviginiarungnaqhiyavut angayuqqaanguyumut  munaqtiuyumulluunniit nukaghiuguvit 12-nik ukiunik uqaqvigilugu havakvikput ikayurianginni. Taimaa piyuittugut ihumagupta ihuirutaukpat ihuaqtqiyanut piumayangnut.

Ilihimayukhauyugut uqariyukhaugupta hunamiklikaak, havaqatiniaqtagit qanuq taimaa piyaaptingni.

Qanuq piniaqqa uqaqvigigupkit?

Hivulliq uqaqviginiaqtat havaktikput hanaqiyangnuqtakhanut naunaiyaiyi. Apiqhuutiginiaqtait ilingnut:
 
  • atqit
  • ublua nalliutingnut
  • uqaqvigiyaangni naunaitkutitit
  • ihumaaluutigiyangnik

Tuglia,uqaqviginiarungnaqhiyat atauhiqmut nutaqqanut inulramminullu akhuuklhaiyit ayuittiaqhimayunut. Taivaktavut havatit akhuukhaiyit naittumik taivlugit. Akhuukhaiyi naunaikniaqtait qanuq havakvikput ikayuqniaqmagaat,naunaiklugu pilaarutit hiamitigakhaungittunut naunaikhilutillu havaqatigiyumavluta.

 Havakti taimaa piniaqtuq:

  • naalaklutit
  • apiqhurlutit kangiqhiyaamini qanuriliurutauyunut
  • apqirilutit humik piumayangnut
  • uqarilugit ikayuutikhaptingnut

Taimaa iniqqata, piumayangnik piinariqaqtutit havaqatigilugu iliptikkut akhuukhaiyilu.  Hivuliqtiuniaqtutit ukununga havaktakhanut akhuukhaiyillu. Tamaptik, ikayuutikhanut qanuriliurutikhaliuqniaqtutik.

Uqaqvigiyumayaraluatka havakviffingnut kihimi kavamatkunit munariyauyunga ayuqhautigivlugulu aallanit tuhaalimaittunut uqaqvigivikhamnut. Qanuq piniaqqik?

Pidjutikhaqaqtutit havagviptingnut uqariangni aallanut tuhaapkaknaittumik. Taimaa kangiqhidjutaa inuk igluqaqtuq paqittiyukhauyuq aallanit tuhaapkaknaittumik uqaqvigivikhangnut uvaptingnut qaritauyakkut titiraqvigilutaluunniit. Taimaatullu, uvaptingnut titiqqiyumaguvit, atannguyap tuyuqtakhaa una titiqqidjutauyuq havagviptingnut anmaqhimaittumik.

Hunamiklikaak havagvikhi uvaptingnut ikayuutilimaitait hunavalungnut?

Havakpaktavut hivuniqaqtut uumunga Nutaqqanut Inulramminullu Maligaq. Una maligaq ihuaqhivagait hunat havagvikput pittaaqtait pilimaitaillu.

Ataani uumani maligaqmi, pilimaitavut:

  • tupilauyaulutik
  • ihumaliurutilugit nutaqqanik tiguyauhimayunut qanuriliurutikhainut
  • ilaulutik inmikkut qanuriliurutikhaliuqtunut nanminiqaqtuni nanminiriyauyumullu havagvingnut

Hunamullikaak ikayuqhirumaguvit, uqaqvigiluta. Ikayulimaitkupta, ikayuqtukhamik naunaikhiniaqtugut.

Maligatigut uvamnut uqaudjiutikhaqaqqit?

Tupilauyaungittugut ikayulimaittugut maligatigut uqaujiutikhanik.  Aallanut kihimi ikayuqtaaqtugut, paqittiinnaqtaaqtugut tupiluayakhangnut.

Ikayuqniaqqinga Nunavunmiingitkaluaqtillunga?

Uqaqvigiluta Nunavunmiutauguvit kihimi kavamatkunit munaqtitauguvit ikayuqhiruvilluunniit hilataanit Nunavunmit. Havakvikput havaarivaktait pidjutit qanuriliurutauhimayut Nunavunmi. Ikayuqtaarungnaqhiyugut havaqatigilugu nutaqqanut inulramminullu ikayuqtiuyunut havagvianut nunaanni avikturviinniluunniit nayuqtangni.

Uqaqvigiluta akiittumut hivayarvianut talvunga 1-855-449-8118, Hivulliqmit Tallimiutmut 8:30am-mit 5:00pm-mut EST.