Hivulliqpaami Uqaqatigigupta
Ikayuqtivut ayuittiaqtuq kiuvaktaat tamaita hivulliqpaami ikayuqtauyumayut havakviptiknut – humaangittuq pigumik hivayautikkut, titirarumi, kayumiktukkut qaikpatluuniit. Ikayuqtauyumayut nutaqqat inuulrammiilluuniit hivulliutivaktaqqut. Talvannga uqaqatigupta, tamna ikayuqtiuyuq ayuittiaqtuq apiriniaqqaatit apirhuutinik. Hapkuninnga:
- atinga inuulrammiiq ihumaalutigiyauyuq (inirniuguvit)
- tamna inuulrammiup annivia
- atiit
- hivayautit, qaritauyakkut titiraqvit unalu/unaluuniit iglup nampanga
- kitu ihumaalutigiyat
Tamna ikayuqtivut ayuittiaqtuq talvannga tuniniaqqaa naunaitkutat havaktimut nakuutqiamik ikayuqniaqtaatit.
Havaqatigiiktuq Ikayuqtiuyumut
Hivayaruvit inuup hunavalunganik, tamna ikayuqtivut ayuittiaqtuq uqaqatigipkainiaqqaatit nutaranut inuulramminullu ikayuqtiuyuq ayuittiaqhimayumut. Una ayuittiaqhimayuq naunaipkainiaqqaatit havakviptiknik. Naunaiyarniaqqaa qanuqtut ikayuqtaaqtugut. Naunaiyarniaqqaalu pilaarutit hiamitiqtittailiniqmut
Tamna ikayuqtiuyuq ayuittiaqtuq naunaiqniaqqaatit nutaraqluuniit ikayurutikharnik. Tamna ikayuqtiuyuq ayuittiaqtuq talvannga:
- naalakniaqtuq ihumaalutigiyarnik
- apiriniaqtuq apirhuutinik taimaa kangirhiqpiariamikni ihumaalutauyuq
- uqarluni akhuurutininnga inuulrammiup naunaiqtitauyuq havaamut
- uqarniaqquq qanuqtut ikayuqtaaqtugut
Inmikkut Ikayuut Pipkaidjutauyuq Nutaramit Inuulrammiuyumilluuniit
Piinaqtaaqtavut tamaita uvaptiknut pipkaidjutauyut ihivriurutauyulluuniit. Kihimi, inmikkut ikayuutikput havaanga talvannga naunaiqtauyuq inuulrammiimit ilauyuq, piyuq pittaarninnganit. Ilaani inirniit uqaqpaktut ihumaalutinganik nutaraq uvaptiknut. Taimailiuqqat, uqaqatiginiarahuaqniaqqaqqut tamna inuulrammiiq. Inuulrammiuyuq uvaptiknit ikayuqtauyumayuq talvannga havaqatigikniaqtaa ikayuqtimit nutaramut ikayuqtiuyuq ayuittiaqtumit. Atauttikkut, piniaqtut ikayuutikhamiknik ihumaliuqlutik. Tamna ihumaliurut pittaaqtuq tuniluni naunaitkutinik. Pittaaqtuqluuniit aadlamik inmikkut ikayuutinik. Ilaani naunaiqniaqtavut tamna nutaraq pilimaitpat naunairiami ikayuutikhanganik. Taimatpat, havakvikput havaqatigiikniaqtaa tamna inirniq qanuqtut ikayuqtukhauyugut.
Aadla Ikayuutikhat
Tamna Ikayuqtuq ayuittiaqtuq ihumaliurniaqtuq piumayarnik aadlamut piyukhaugaluaq havaktiptiknut. Una pittaaqtuq:
- ihumaalutiqaruvit hivitutqiyauyuq ihumaalut
- uqarumaguvit ihivriurumaguvit qayangnaqtumikluuniit aaniqtuqaqtuq tuqudjutauyuqluuniit
- apirhuruvit inuknut uqaqtukhanik
Tamna ikayuqtuq ayuittiaqtuq ihuatqiamut ikayuqtiuyumut uqaqatigipkainginnaqniaqtaatit.