ᐃᓐᓇᑐᖃᖁᑎᕗᑦ ᐅᖃᐅᔾᔨᒋᐊᖅᑏᑦ


ᒦᑲ ᐊᕐᓇᒃᑲᖅ
ᐸᖕᓂᖅᑑᖅ

ᒦᑲ ᐊᕐᓇᒃᑲᖅ ᐸᖕᓂᖅᑑᕐᒥᐅᑕᐅᕗᖅ ᕿᑭᖅᑖᓗᒻᒥ. ᓄᓇᓕᖕᓂ ᓯᕗᓕᖅᑎᐅᓪᓗᓂ ᐃᓕᓴᕆᔭᐅᓯᒪᔪᖅ ᐃᖅᑲᓇᐃᔮᖃᖃᑦᑕᕐᓂᑯᖓᓄᑦ ᒪᒥᓴᐃᓂᕐᒧᑦ ᐱᓕᕆᐊᖃᖅᑎᑦᑎᕈᓘᔭᖅᐸᑦᑐᓂ ᐃᓄᖕᓄᑦ. ᐃᓚᐅᖃᑕᐅᖃᑦᑕᓲᖅ ᑐᒃᓯᐊᕐᕕᖓᓂᒃ, ᐊᒻᒪᓗ ᐃᓕᓐᓂᐊᑎᑦᑎᕙᓚᐅᖅᓯᒪᓪᓗᓂ ᐃᓅᓯᕐᒥᒃ ᐊᑐᕐᓗᓂ ᐊᔪᕈᓐᓃᖅᓴᓂᕐᒥᒃ ᐊᒻᒪᓗ ᐃᓄᒃᑎᑐᑦ ᐃᓕᓐᓂᐊᑎᑦᑎᕙᑦᑐᓂ ᓄᓇᕗᑦ ᓯᓚᑦᑐᓴᕐᕕᖓᓂ 30 ᐊᕐᕌᒍᑦ ᐅᖓᑖᓄᑦ. ᐸᖕᓂᖅᑑᑉ ᓯᓚᑖᓂ, ᐃᖅᑲᓇᐃᔭᖃᑎᖃᖃᑦᑕᕐᓂᑰᕗᖅ ᐃᓄᐃᑦ ᑲᑐᔾᔨᖃᑎᒌᖏᖕᓂᑦ ᓲᕐᓗᒃ ᑐᙵᓱᕝᕕᖓᑦ ᐃᓄᐃᑦ ᐊᒻᒪᓗ ᒪᒥᓴᕐᕕᒃ ᐋᑐᕚᒥ. ᒪᒥᓴᕐᕕᒻᒥ ᐃᖅᑲᓇᐃᔭᖅᑎᓪᓗᒍ, ᐱᓕᕆᐊᖃᓗᐊᓚᐅᖅᐸᓚᐅᖅᓯᒪᕗᖅ ᒪᒥᓴᖅᑎᑎᓪᓗᓂ ᐋᓐᓂᓗᐊᖅᓯᒪᔪᓂᑦ ᐊᒻᒪᓗ ᐋᙵᔮᕐᓇᖅᑐᓂᑦ ᓄᖅᑲᕈᓐᓇᐃᓪᓕᓯᒪᔪᓂᑦ ᐃᓄᐃᑦ ᐱᖅᑯᓯᖏᖕᓂᑦ ᐃᓕᖅᑯᓯᖏᖕᓂᓗ ᐊᑐᖅᑐᓂ. ᓇᒻᒥᓂᕐᓗ ᐃᙱᐅᓯᕐᒥᓂᒃ ᑎᑎᕋᖅᑎᐅᕗᖅ.

1994-ᖑᑎᓪᓗᒍ, ᒦᑲ ᐱᔾᔪᓯᐊᓚᐅᖅᓯᒪᔪᖅ ᓯᓚᑐᔪᖅ ᐊᕐᓇᖅ ᐃᓕᓴᕆᔭᐅᔾᔪᑎᒥᒃ ᐊᒻᒪᓗ 2009-ᖑᑎᓪᓗᒍ, ᓇᓗᓇᐃᒃᑯᑕᖅᑖᖅᑎᑕᐅᓪᓗᓂ ᓄᓇᕗᑦ ᓯᓚᑦᑐᓴᕐᕕᖓᑕ ᑲᑎᒪᔨᖏᖕᓄᑦ. ᒦᑲ ᐃᓐᓇᑐᖃᐃᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᖕᓄᑦ ᐃᓚᒋᔭᐅᓚᐅᖅᓯᒪᒋᕗᖅ ᑲᓇᑕᒥ ᐱᓕᕆᕝᕕᒃ ᐋᙵᔮᕐᓇᖅᑐᓂᑦ ᓄᖅᑲᕈᓐᓇᐃᓪᓕᓯᒪᔪᓄᑦ ᐃᑲᔪᖅᑎᖏᖕᓂᑦ.

ᒦᑲ ᑕᓪᓕᒪᓂᑦ ᕿᑐᕐᖓᓕᒃ, ᖁᓕᓂᑦ ᐃᕐᖑᑕᖃᖅᑐᓂ, ᐊᒻᒪᓗ ᐱᖓᓱᓂᑦ ᐃᓗᓕᖃᖅᑐᓂ. ᓄᓇᑐᐃᓐᓇᕐᒦᓛᕐᓗᓂ ᖁᕕᐊᓱᑉᐳᖅ ᐊᐅᓪᓚᖅᓯᒪᓛᕋᒥ ᐅᐱᕐᖏᓐᓇᖅᓯᒻᒥᒍᓂ.

 

ᕼᐃᐊᓚᓐ ᐃᒍᑉᑕᖅ
ᑲᖏᖅᖠᓂᖅ

ᕼᐃᐊᓚᓐ ᐱᕈᖅᓴᓚᐅᖅᓯᒪᕗᖅ ᐊᐅᓪᓚᖃᑦᑕᖅᑐᑎᑦ ᐃᓚᒌᑦ ᐃᖃᓗᒃᑑᑦᓯᐊᕐᒥ ᐊᒻᒪᓗ ᒋᐅᕆ ᑕᓯᖓᓄᑦ. ᐃᓚᒌᖑᓪᓗᑎᑦ ᓄᑦᑎᓕᓚᐅᖅᓯᒪᕗᑦ ᖃᒪᓂ’ᑐᐊᕐᒧᑦ ᐊᒻᒪᓗ ᑲᖏᖅᖠᓂᕐᒧᑦ, ᓄᓇᓕᐅᔪᖅ ᓴᕕᕋᔭᒃᓴᓂᑦ ᐅᔭᕋᓐᓂᐊᕐᕕᖓ ᓴᓇᔭᐅᓚᐅᖅᑎᓪᓗᒍ. ᐱᖓᓲᔪᖅᑐᓂᑦ ᐊᑕᐅᓯᕐᓗ ᐅᑭᐅᖃᓕᖅᑎᓪᓗᒍ, ᐊᐅᓪᓚᖅᑎᑕᐅᓚᐅᖅᓯᒪᕗᖅ ᐃᓕᓐᓂᐊᕆᐊᖅᑎᑕᐅᓪᓗᓂ ᐃᒡᓗᓕᒑᕐᔪᖕᒧᑦ.

ᕼᐃᐊᓚᓐ ᐃᖅᑲᓇᐃᔭᕐᓂᑰᕗᖅ ᐃᓕᓐᓂᐊᕐᕕᓂ ᐃᓕᓴᐃᓪᓗᓂ ᓄᑕᖅᑲᓂᑦ ᒥᑭᔫᑕᐅᓂᖅᐹᓂᑦ ᖁᑦᑎᓐᓂᓖᑦ ᑎᓴᒪᐅᔪᖅᑐᑦ ᐊᑕᐅᓯᕐᓗ 40 ᐊᕐᕌᒍᑦ ᐅᖓᑖᓄᑦ ᐊᑯᓂᐅᑎᒋᓕᖅᑐᖅ. ᒫᓐᓇ ᐃᖅᑲᓇᐃᔭᕈᓐᓃᖅᑐᖅ ᐊᑯᓂᐅᔪᖅ ᐃᖅᑲᓇᐃᔭᑯᑖᒃᓯᒪᓕᕐᓂᖓᓄᑦ ᑭᓯᐊᓂᓕ ᐃᖅᑲᓇᐃᔭᖃᑎᖃᖃᑦᑕᖅᓯᒪᓂᖓᓄᑦ ᓄᑕᖅᑲᓂᑦ ᒥᑭᔫᑕᐅᓂᑦ ᐃᑲᔪᕈᒪᔾᔪᑎᒋᓯᒪᓕᖅᑕᖓᑦ ᓄᑕᖅᑲᓂᑦ. ᐱᒻᒪᕆᐅᓇᓱᒋᒻᒪᒍ ᓄᑕᖅᑲᑦ ᐃᓐᓇᕐᒧᑦ ᓈᓚᒃᑕᐅᔪᓐᓇᕐᓗᑎᑦ ᐊᒻᒪᓗ ᐃᑲᔪᖅᑐᖅᑕᐅᖃᑦᑕᕐᓗᑎᑦ ᓂᐱᖏᑦ ᓈᓚᒃᑕᐅᖃᑦᑕᕐᓂᐊᕐᒪᑕ ᓱᕈᓯᐅᓂᖏᖕᓂ.

ᐅᓪᓗᒥᐅᔪᖅ, ᕼᐃᐊᓚᓐ ᐊᓈᓇᒋᔭᐅᓕᖅᑐᖅ ᐱᖓᓱᓄᑦ ᐸᓂᖏᖕᓄᑦ, ᐊᒻᒪᓗᑦᑕᐅᖅ ᐃᕐᓂᕆᓚᐅᖅᓯᒪᔭᖓ ᐃᓅᒍᓐᓃᖅᓯᒪᓂᑯ. 16-ᓂᑦ ᐃᕐᖑᑕᓕᒃ ᐊᒻᒪᓗ ᖁᓕᓂᑦ ᐃᓗᓕᖃᖅᑐᓂ. ᓱᔭᒃᓴᖃᙱᑲᐃᓐᓇᕋᐃᒐᒥ ᖁᕕᐊᒋᔭᖃᓲᖅ ᐃᓅᔭᓕᐅᖅᑐᓂ, ᓄᕕᖅᓴᖅᑐᓂ, ᐊᒻᒪᓗ ᐱᖅᓱᖅᑐᓂ ᐃᓄᐃᑦ ᐊᓐᓄᕌᖏᖕᓂᑦ. ᐃᓄᐃᑦ ᐊᐱᕆᓗᐊᓲᑦ ᕼᐃᐊᓚᓐ−ᒥᒃ ᓴᓇᔭᐅᖁᔭᐅᓪᓗᓂ ᐊᒡᒐᒧᑦ ᓴᓇᐅᒐᕐᓂᑦ.
 

ᓘᓯ ᒥᒃᑭᒐᖅ
ᑲᖏᖅᖠᓂᖅ

ᓘᓯ ᐃᓅᓚᐅᖅᓯᒪᕗᖅ ᐊᒻᒪᓗ ᐱᕈᖅᓴᔪᒥᓂᐅᓪᓗᓂ ᑲᖏᖅᖠᓂᕐᒥ. ᑭᕙᓪᓕᕐᒥᐅᑕᐅᓪᓗᓂ ᐃᓅᓯᖓᓂᒃ ᖁᕕᐊᒋᔭᓕᒻᒪᕆᐊᓗᒃ ᐊᒻᒪᓗ ᐅᐱᒍᓱᑦᑐᒻᒪᕆᐅᓪᓗᓂ ᓄᓇᓕᖓᓂᒃ. ᐃᖅᑲᓇᐃᔭᖅᑐᖅ ᐃᓄᖕᓄᑦ ᑭᒃᑯᑐᐃᓐᓇᕐᓄᑦ ᐃᓕᓐᓂᐊᕐᕕᒻᒥ ᐃᓅᓯᓕᕆᔨᐅᓪᓗᓂ ᐊᒻᒪᓗ ᖁᕕᐊᒋᔭᓕᒃ ᐃᑲᔪᖅᑐᓂ ᓄᑕᖅᑲᓂᑦ ᐃᑲᔪᖅᑕᐅᔭᕆᐊᖃᓕᕋᐃᒻᒪᑕ. ᓘᓯ ᖃᐅᔨᒪᓂᖃᑦᑎᐊᑐᒻᒪᕆᒃ ᐃᓄᐃᑦ ᖃᐅᔨᒪᓂᖏᖕᓂᑦ ᐊᒻᒪᓗ ᖁᕕᐊᒋᔭᖃᓲᖑᓪᓗᓂ ᐃᓕᓐᓂᐊᖅᑎᑦᑎᔭᕆᐊᒃᓴᖅ ᖃᐅᔨᒪᔭᒥᓂᒃ ᓄᑕᖅᑲᓂᑦ ᐊᒻᒪᓗ ᒪᒃᑯᑦᑐᓂᑦ.

ᓘᓯ ᓯᓚᑐᐃᓐᓇᕐᒦᒍᒻᒪᐅᕗᖅ. ᐅᑭᐊᒃᓵᖑᑎᓪᓗᒍ, ᖁᕕᐊᒋᔭᓕᒃ ᑐᒃᑐᓯᐅᖅᑐᓂ ᐊᒥᖏᑦ ᐱᐅᓛᖑᒻᒪᑕ ᑲᒪᒋᔭᐅᓗᑎᑦ. ᐅᐱᕐᖓᒃᓵᒃᑯᑦ, ᖁᕕᐊᒋᔭᓕᒃ ᐅᐱᕐᖏᓗᓂ: ᐱᑦᑎᓕᐅᖅᑐᓂ ᐊᒻᒪᓗ ᓂᒃᑯᓕᐅᖅᑐᓂ; ᐊᒻᒪᓗ ᓇᑦᑎᑉ ᕿᓯᖏᖕᓂᑦ ᓄᐊᑦᑎᓪᓗᓂ ᐱᖃᑎᒋᓪᓗᓂᒋᑦ ᐅᐃᖓ, ᐃᕐᓂᖓ, ᐊᒻᒪᓗ ᐱᖓᓱᑦ ᓂᖓᐅᖏᑦ. ᐊᕐᕌᒍᓗᒃᑖᕐᒥ, ᓘᓯ ᓂᕿᓂᒃ ᐸᐸᑦᑎᓲᖅ ᐃᓚᒥᓄᑦ ᐅᑭᐅᒃᑯᑦ ᓂᕆᔭᐅᓛᑐᓂᑦ.

ᐃᕐᓂᖓᓗ, ᓘᓯ ᐱᖓᓱᓂᑦ ᐸᓂᖃᖅᑐᖅ, 15−ᓂᑦ ᐃᕐᖑᑕᖃᖅᑐᓂ.

 

 

ᒥᐊᕆᐊᒻ ᓂᓚᐅᓛᖅ ᐊᒡᓗᒃᑲᖅ
ᐅᖅᓱᖅᑑᖅ

ᒥᐊᕆᐊᒻ ᐃᓕᓴᐅᔨᐅᕗᖅ ᐊᒻᒪᓗ ᐊᔭᐅᕆᔨ ᐃᓄᒃᑐᑦ ᐊᑐᖅᑕᐅᔫᒥᓇᓱᒃᑎᑉᐸᑦᑐᓂᐅᒃ ᓇᑦᑎᓕᖕᒥ ᐅᖃᐅᓯᕆᔭᐅᒐᒥ ᕿᑎᕐᒥᐅᓂ. ᓯᕗᓪᓕᖅᐹᖑᓯᒪᕗᖅ ᐃᒃᓯᕙᐅᑕᐅᓚᐅᖅᓯᒪᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᑕ ᑲᑎᒪᔨᖏᖕᓄᑦ, ᒪᕐᕈᐊᖅᑎᖅ ᑲᑎᒪᔨᐅᓚᐅᖅᓯᒪᓪᓗᓂ, 2003-2006 ᐊᒻᒪᓗ 2006-2009−ᒧᑦ. ᐃᓄᐃᑦ ᐃᓕᖅᑯᓯᑦᑎᐊᕚᓗᖏᖕᓂᑦ ᐱᒻᒪᕆᒋᔭᖏᖕᓂᑦ ᑲᑎᒪᔨᕋᓛᓃᖃᑕᐅᔪᖅ, ᐃᓄᐃᑦ ᖃᐅᔨᒪᔭᑐᖃᖏᑕ ᐃᓕᓐᓂᐊᕈᑎᒃᓴᓕᐅᖅᑏᑦ ᑲᑎᒪᔨᕋᓛᖏᖕᓂ ᐃᒃᓯᕙᓪᓗᓂ, ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᑲᑎᒪᔨᐅᖃᑕᐅᓪᓗᓂ, ᐊᒻᒪᓗ ᓄᓇᕗᒻᒥ ᐃᓐᓇᐃᑦ ᐃᖅᑲᖅᑐᐃᔨᕋᓛᒃᑯᑦ ᑲᑎᒪᔨᖏᖕᓄᑦ ᐃᓚᒋᔭᐅᓪᓗᓂ.

ᒥᐊᕆᐊᒻ ᐅᖃᐅᓰᑦ ᑐᑭᖏᖕᓂᑦ ᑎᑎᕋᕆᐊᓯᓚᐅᖅᓯᒪᔪᖅ ᓇᑦᑎᓕᖕᒥᐅᑦ ᐅᖃᐅᓯᖓᓂᑦ ᐊᑐᖅᑐᓂ ᐃᓱᒫᓘᑎᖃᕐᓂᖓᓄᑦ ᐅᖃᐅᓯᓕᕆᓂᕐᒨᖓᔪᓂᑦ ᐃᑲᔫᑎᒃᓴᖅᑕᖃᙱᓗᐊᕐᒪᑦ ᐅᖃᕈᓯᖓ ᐊᑐᖅᑕᐅᓗᓂ.

 

 

 

ᒨᓴ ᐋᑲᕙᒃ
ᐃᖃᓗᐃᑦ


ᒨᓴ ᐃᖅᑲᓇᐃᔮᖃᖃᑦᑕᕐᓂᑰᕗᖅ ᐊᔾᔨᒌᙱᑦᑐᕈᓘᔭᕐᓂᑦ ᐃᓅᓯᖓᓂ. ᐃᖅᑲᓇᐃᔭᕇᖅᓯᒪᔪᖅ ᐊᑯᓂᐅᔪᖅ ᐃᖅᑲᓇᐃᔭᑯᑖᓐᓂᖓᓄᑦ ᓄᖅᑲᖓᓕᖅᑐᓂ ᐸᓖᓯᐅᓚᐅᖅᓯᒪᓪᓗᓂ ᐳᑭᖅᑕᓕᒃᑯᓐᓄᑦ, 30 ᐊᕐᕌᒍᑦ ᐊᑯᓂᐅᑎᒋᔪᖅ ᐃᖅᑲᓇᐃᔭᕐᓂᑰᓪᓗᓂ ᓄᓇᓕᓐᓂ ᐃᑲᔪᖅᑐᐃᕝᕕᓕᕆᓂᕐᒧᑦ ᐊᒻᒪᓗ ᐃᖅᑲᖅᑐᐃᕕᓕᕆᓂᕐᒧᑦ ᐱᔨᑦᑎᕋᖅᑎᓂᑦ, ᐊᒻᒪᓗᑦᑕᐅᖅ ᐸᖅᓴᐃᔨᐅᓯᒪᓪᓗᓂ. ᐊᖑᓇᓱᒃᑎᐅᓪᓗᓂ, ᐊᔪᙱᑐᒻᒪᕆᐅᕗᖅ ᐊᒻᒪᓗ ᐊᑐᖃᑦᑕᕐᓂᑰᕗᖅ ᐱᖅᑯᓯᑐᖃᒃᑯᑦ ᐃᓄᐃᑦ ᐃᓅᓯᖓᓂᒃ ᐊᑐᓲᖑᓪᓗᓂ ᐊᒻᒪᓗ ᐃᓕᖅᑯᓯᖓᓂᒃ, ᐱᖃᓯᐅᑎᓪᓗᒍ ᓄᓇᑐᐃᓐᓇᕐᒦᒍᓐᓇᖅᑐᓂ ᐊᓐᓇᐅᒪᓗᓂ. ᖃᐅᔨᒪᓂᕐᒥᓂᒃ ᑲᑐᔾᔨᔪᒻᒪᐅᕗᖅ, ᒫᓐᓇᕈᓗᓪᓗ ᐃᓕᓐᓂᐊᑎᑦᑎᕋᑖᓚᐅᕆᕗᖅ ᒪᒃᑯᑦᑐᓂᑦ ᐃᓄᖕᓂᑦ ᖃᓄᖅ ᖃᔭᓕᐅᕈᓐᓇᕐᒪᖔᑕ, ᑕᑯᒃᓴᐅᑎᑕᐅᓚᐅᖅᓯᒪᓪᓗᓂ ᑯᐃᒧᑦ ᐅᐃᖓᓄᓪᓗ ᐃᖃᓗᓐᓄᑦ ᓂᐅᕐᕈᒻᒪᑎᒃ 2017-ᖑᑎᓪᓗᒍ.

ᐃᓕᓐᓂᐊᖅᑎᑦᑎᙱᑦᑎᓪᓗᒍ ᐊᒻᒪᓗ ᐊᔾᔨᒌᙱᑦᑐᓂᑦ ᐱᓕᕆᐊᕐᓂᑦ ᐃᓕᓐᓂᐊᕋᒃᓴᓂᓪᓗ ᐊᐅᓚᑦᑎᑎᓐᓇᒍᓗ, ᐊᒡᒐᒥᓂᒃ ᐊᑐᖅᑐᓂ ᓴᓇᑎᓪᓗᒍ ᖃᐅᔨᔪᓐᓇᖅᑕᐃᑦ ᐊᖁᒃᑲᓗᐃᑦ ᐅᐱᕐᖏᕕᖓᓂ, ᓯᓚᑕᑦᑎᐊᖓᓂ ᐃᖃᓄᐃᑦ, ᓴᓇᓪᓗᓂ ᐃᖅᑲᓇᐃᔭᕈᓐᓃᖅᑲᑦ ᐃᒡᓗᕋᓛᒃᓴᕆᒐᔭᖅᑕᖓᓂᒃ.
 
ᒨᓴ ᐅᐃᒋᔭᐅᕗᖅ ᓇᒡᓕᒋᔭᒥᓄᑦ ᐱᑦᓯᐅᓛᕐᒧᑦ ᐊᒻᒪᓗ ᐊᑖᑕᑦᑎᐊᕙᐅᓪᓗᓂ ᑕᓪᓕᒪᓄᑦ ᓱᕈᓯᕐᓄᑦ. ᑭᒻᒥᕈᕐᒥ, ᓄᓇᕗᑦ ᐃᓅᓚᐅᖅᓯᒪᔪᖅ.
 
 
 
ᐱᑦᓯᐅᓛᖅ ᐋᑲᕙᒃ
ᐃᖃᓗᐃᑦ
 
ᐱᑦᓯᐅᓛᖅ ᐃᓅᓚᐅᖅᓯᒪᔪᖅ ᓄᓇᓕᕋᓛᕐᒥ ᑭᒻᒥᕈᑦ, ᓄᓇᕗᑦ ᖃᓂᒋᔭᖓᓂ.
 
ᐱᓕᒻᒪᒃᓴᖅᓯᒪᓪᓗᓂ ᐃᓅᓯᓕᕆᔨᐅᕗᖅ ᐊᒻᒪᓗ ᐃᖃᓗᐃᑦ ᓄᓇᓕᖓᓂ ᑭᓱᓕᕆᕈᓘᔭᒃᑳᓘᓪᓗᓂ, ᓄᓇᒋᓕᖅᑕᒥᓂᒃ. ᐊᒥᓱᓂᑦ ᐱᓕᕆᐊᕐᓂᑦ ᐃᓚᐅᖃᑕᐅᖃᑦᑕᕐᓂᑯᖅ: ᐃᓄᓕᕆᓂᖅ, ᐃᓕᓐᓂᐊᕐᕕᒻᒥ ᐃᓅᓯᓕᕆᔨᐅᓪᓗᓂ, ᐊᒻᒪᓗ ᐅᐃᖓᓂᒃ ᐃᖅᑲᓇᐃᔭᖃᑎᖃᖃᑦᑕᕐᓂᑯ ᐊᔾᔨᒌᙱᑦᑐᓂᑦ ᐱᓕᕆᐊᕐᓂᑦ ᐊᒻᒪᓗ ᐃᓕᓐᓂᐊᕋᒃᓴᓂᑦ ᑲᒪᓪᓗᑎᒃ, ᐱᖃᓯᐅᑎᓪᓗᒍ ᓄᓇᓕᕋᓛᕐᒥ ᐊᐅᓚᑦᑎᓪᓗᑎᒃ ᒪᓕᒐᓕᕆᔨᒃᑯᑦ ᐃᑲᔪᖅᑕᐅᕝᕕᓕᕆᔨᒃᑯᖏᖕᓄᑦ. ᒫᓐᓇᒫᖑᑎᓪᓗᒍ, ᐃᖅᑲᓇᐃᔭᖃᑎᖃᖅᓯᒪᔪᖅ ᐃᓕᓴᖅᓯᕕᒃᑯᓐᓂ, ᓄᓇᓕᓐᓂ ᑐᙵᕕᓕᒃ ᑲᑐᔾᔨᖃᑎᒌᖑᔪᖅ ᐃᓄᖕᓄᑦ, ᓄᓇᓕᖕᓂ ᖃᓄᐃᑦᑕᐃᓕᒪᓂᕐᒧᑦ ᐊᒻᒪᓗ ᓇᖕᒥᓂᖅ ᖃᓄᐃᑦᑕᐃᓕᒪᓂᕐᒧᑦ ᐊᑐᕐᔫᒥᑎᑦᑎᓇᓱᐊᓲᑦ.
 
ᐱᑦᓯᐅᓛᖅ ᑲᑎᑎᑕᐅᓯᒪᕗᖅ ᐃᓅᓯᓕᒫᑲᓴᖓᓄᑦ ᐊᐃᒋᓕᖅᑐᓂᐅᒃ, ᒨᓴ, ᐊᒻᒪᓗ ᑕᓪᓕᒪᓂᑦ ᕿᑐᕐᖓᓖᒃ: ᔫᓇ, ᔮᓱᐊ, ᓖᓇ, ᔭᐃᒥ ᐊᒻᒪᓗ ᐃᓅᓯᖅ. ᓇᒡᓕᒍᓱᑦᑐᓂ ᐊᓈᓇᑦᑎᐊᕆᔭᐅᕗᖅ 23-ᓄᑦ ᐃᕐᖑᑕᖏᖕᓄᑦ. ᐱᑦᓯᐅᓛᖅ ᖁᕕᐊᒋᔭᓕᒃ ᒥᖅᓱᖅᑐᓂ ᐊᓐᓄᕌᕆᔭᐅᖃᑦᑕᖅᓯᒪᔪᓂᑦ ᐊᑯᓂᐅᔪᖅ ᐱᖅᑯᓯᑐᖃᖅᑎᒍᑦ ᐊᒻᒪᓗ ᐊᖏᓇᓱᒃᑐᖅᓯᐅᑎᓂᑦ ᐊᓐᓄᕌᓕᐅᕈᒪᓲᖅ ᐃᓚᒥᓄᑦ. ᓯᓚᒦᒍᒻᒪᐅᕗᖅ ᐊᒻᒪᓗ ᐃᑲᕐᕋᕗᑦ ᓈᓴᕋᒃᓴᐅᙱᒻᒪᕆᑦᑐᓄᑦ ᐃᖃᓗᒐᓱᐊᕈᒪᓲᖑᕗᖅ.
 
ᐱᑦᓯᐅᓛᖅ ᐃᑲᔪᖅᑐᐃᓲᖅ ᐊᑐᖅᑐᓂ ᐃᓄᐃᑦ ᐃᓕᖅᑯᓯᑦᑎᐊᕚᓗᖏᑕ ᐱᒻᒪᕆᒋᔭᖏᖕᓂᑦ ᖃᐅᑕᒫᑦ ᐊᒻᒪᓗ ᐃᑲᔪᓲᖅ ᓄᑕᖅᑲᓄᑦ ᒪᒃᑯᑦᑐᓄᓪᓗ ᑭᒡᒐᖅᑐᐃᔨᑉ ᐊᓪᓚᒡᕕᐊᓂ ᐊᑐᓕᖅᑎᑦᑎᒃᑲᓐᓂᕈᒪᓪᓗᓂ ᑕᒪᒃᑯᓂᖓ ᐃᓄᐃᑦ ᐃᓕᖅᑯᓯᖏᖕᓂᑦ ᑭᒡᒐᖅᑐᐃᔨᒃᑯᑦ ᐱᓕᕆᐊᕐᒥᖕᓂᒃ ᑲᒪᑎᓪᓗᒋᑦ.