ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᓄᑕᖅᑲᑦ ᐱᔪᓐᓇᐅᑎᖏᑦᑕ ᒥᒃᓵᓄᑦ ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᐃᑲᔪᖅᓱᖅᑕᐅᕐᔪᐊᖅᐳᑦ ᐊᖓᔪᖅᑳᑦ ᓄᑕᖅᑲᓪᓗ ᐱᓕᕆᐊᕆᓲᖏᓐᓂᒃ ᓄᑕᖅᑲᑦ ᐃᓅᓯᖏᓐᓂᒃ. ᐃᒪᐃᒻᒪᑦ, ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᐃᓕᑕᖅᓯᐅᒪᖕᒪᑕ ᖃᑕᙳᑎᒌᑦ ᐱᕈᕐᕕᑦᑎᐊᕙᐅᓂᖏᓐᓂᒃ ᓄᑕᖅᑲᓄᑦ ᑐᙵᕕᒋᔭᐅᓪᓚᕆᖕᓂᖏᓐᓄᑦ.
ᐊᖏᖃᑎᒌᒍᑎᑦ ᐱᖁᔨᕗᖔᕈᑎᑦ ᐊᖅᑯᑕᐅᓪᓗᑎᒃ, ᐊᖓᔪᖅᑳᑦ/ᒪᓕᒐᖅᑎᒍᑦ ᑲᒪᔨᙳᖅᓯᒪᔪᑦ ᓄᑕᖅᑲᓂᒃ ᐱᕈᐃᔭᕆᐊᖃᓲᖑᖕᒪᑕ. ᐊᖏᖃᑎᒌᒃᖢᑎᑦ ᐱᖁᔨᕗᖔᕈᑎᒃᑯᑦ ᐅᖃᖅᓯᒪᖕᒪᑦ ᑕᒪᓐᓇ ᐱᓕᕆᐊᖑᔭᕆᐊᖃᕐᓂᖓᓂᒃ ᓄᑕᖅᑲᑦ ᐱᓕᕆᐊᕆᔪᒥᒋᓛᖏᓐᓂᒃ ᓈᒻᒪᒃᑎᒋᐊᖃᕐᓂᖏᓐᓂᒃ. ᐊᖓᔪᖅᑳᑦ ᖃᑕᙳᑎᖏᓪᓗ ᑕᒪᑐᒥᖓ ᑲᒪᒋᔭᖃᕈᓐᓇᙱᑉᐸᑕ, ᒐᕙᒪᒃᑯᑦ-ᑲᓇᑕᒥᐅᒐᓗᐊᖅᐸᑦ ᐊᕕᒃᑐᖅᓯᒪᔪᓂᐅᒐᓗᐊᖅᐸᑦ-ᐃᑲᔪᕆᐊᖃᖅᐳᑦ. ᐊᖓᔪᖅᑳᑦ ᖃᑕᙳᑎᒌᓪᓗ ᑕᒪᑐᒥᖓ ᓱᓕ ᐊᐅᓚᑦᑎᔪᓐᓇᙱᑉᐸᑕ, ᑕᐃᒪᓕ ᒐᕙᒪᒃᑯᑦ ᐱᓕᕆᖔᓯᒋᐊᖃᕋᔭᖅᐳᑦ ᓄᑕᖅᑲᑦ ᐱᔪᓐᓇᐅᑎᖏᑦ ᐊᑐᖅᑕᐅᑦᑎᐊᕋᓗᐊᕐᒪᖔᑕ ᖃᐅᔨᒪᓇᓱᒡᓗᑎᒃ.
ᖃᔅᓯᑲᓪᓚᑦ ᑎᑎᕋᖅᓯᒪᔪᑦ ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᑐᑭᓯᓇᖅᑎᑦᑎᕗᑦ ᑖᒃᑯᓂᖓ ᐱᓕᕆᐊᒃᓴᓂᒃ ᑲᒪᒋᔭᒃᓴᓂᒡᓗ.
- ᑎᑎᕋᖅᓯᒪᓂᓕᒃ 5: ᒐᕙᒪᒃᑯᑦ ᐃᒃᐱᒍᓱᑦᑎᐊᕆᐊᖃᖅᐳᑦ ᐊᖓᔪᖅᑳᑦ/ᑲᒪᔨᑦ ᑲᒪᒋᔭᒃᓴᖏᓐᓂᒃ ᕿᑐᕐᖓᒥᖕᓂᒃ ᐱᕈᐃᓂᐊᖅᑎᓪᓗᒋᑦ.
- ᑎᑎᕋᖅᓯᒪᓂᓕᒃ 7: ᓄᑕᖅᑲᑦ ᐱᔪᓐᓇᕐᓂᖃᖅᐳᑦ ᖃᐅᔨᒪᔭᕆᐊᒃᓴᖅ ᑲᒪᒋᔭᐅᑦᑎᐊᕆᐊᒃᓴᕐᓗ ᐊᖓᔪᖅᑳᒥᓄᑦ, ᖃᖓᓕᒫᖅ ᐊᔪᕐᓇᙱᑦᑕᕌᖓᑦ.
- ᑎᑎᕋᖅᓯᒪᓂᓕᒃ 8: ᓄᑕᖅᑲᑦ ᐱᔪᓐᓇᐅᑎᖃᖅᐳᑦ ᐃᓕᓴᕐᓇᐅᑎᒥᖕᓄᑦ - ᐃᓚᓕᐅᑎᓗᒋᑦ ᑲᓇᑕᒥᐅᑕᐅᓂᖓ, ᐊᑎᖓ, ᐊᒻᒪ ᖃᑕᙳᑎᖏᑦ ᑭᓱᒋᖕᒪᖔᒋᑦ.
- ᑎᑎᕋᖅᓯᒪᓂᓕᒃ 14: ᐊᖓᔪᖅᑳᑦ ᐱᔪᓐᓇᐅᑎᖃᖅᐳᑦ ᕿᑐᕐᖓᑎᒃ ᓇᒧᑦ ᐅᒃᐱᕐᓂᖃᖁᒃᐸᒋᑦ ᐅᒃᐱᕐᓂᖃᖅᑎᑦᑐᓐᓇᖅᖢᓂᒋᑦ, ᓈᒻᒪᒃᑎᓪᓗᒋᑦ ᓄᑕᖅᑲᑦ ᐱᕈᖅᐸᓪᓕᐊᔾᔪᓯᖏᓐᓄᑦ ᐅᑭᐅᖃᕈᓯᖏᓐᓄᓪᓗ.
- ᑎᑎᕋᖅᓯᒪᓂᓕᒃ 18: ᑕᒪᕐᒥᒃ ᐊᖓᔪᖅᑳᕆᔭᑦ ᑲᒪᒋᔭᖃᖅᑐᐃᓐᓇᐅᕘᒃ ᕿᑐᕐᖓᒥᓂᒃ ᐱᕈᖅᓴᐃᓇᓱᒋᐊᒃᓴᖅ ᐊᒻᒪ ᒐᕙᒪᒃᑯᑦ ᐃᑲᔪᖅᓱᕆᐊᖃᕐᓂᖏᓐᓂᒃ ᑕᐃᒪᐃᓕᐅᖅᑎᓪᓗᒋᑦ.
- ᑎᑎᕋᖅᓯᒪᓂᓕᒃ 27: ᐊᖓᔪᖅᑳᑦ ᑲᒪᒋᔭᒃᓴᖃᖅᐳᑦ ᓴᐳᔾᔨᓇᓱᒋᐊᒃᓴᖅ ᕿᑐᕐᖓᖏᑦᑕ ᐃᓅᓇᓱᐊᕈᑎᖏᓐᓂᒃ ᐊᒻᒪ ᒐᕙᒪᓕᕆᔾᔪᓯᕐᓂᒃ (ᑐᑭᓯᐊᔭᖏᑦᑎᒍᑦ) ᐃᑲᔪᕐᓗᒋᑦ ᐊᖓᔪᖅᑳᑦ ᑕᐃᒪᐃᓕᐅᖅᑎᓪᓗᒋᑦ.
- ᑎᑎᕋᖅᓯᒪᓂᓕᒃ 29: ᐃᓕᑕᖅᓯᐅᒪᔪᑦ ᐃᓕᓐᓂᐊᖅᑐᓕᕆᓂᖅ ᐃᑲᔫᑕᐅᔭᕆᐊᖃᕐᓂᖓᓂᒃ ᓄᑕᖅᑲᓂᒃ ᐃᒃᐱᒍᓱᑦᑎᐊᕆᐊᖃᕐᓂᖏᓐᓂᒃ ᐊᖓᔪᖅᑳᒥᓂᒃ.
ᑖᓐᓇ ᐅᖃᐅᓯᖅᑕᖅ ᐱᔾᔪᑎᖃᖅᑐᖅ ᐊᖏᖃᑎᒌᒍᑎᑦ ᐱᖁᔨᕗᖔᕈᑎᒃᑯᑦ ᐃᑲᔫᑎᑦᑎᐊᕙᒻᒪᕆᐊᓗᒃ ᖃᓄᑐᐃᓐᓇᑦᑎᐊᖅ ᖃᐅᔨᔭᖃᒃᑲᓐᓂᕈᒪᓐᓂᕈᕕᑦ. ᑐᙵᓱᒃᑎᑕᐅᑦᑎᐊᕐᒥᔪᓯ ᑎᑎᕋᕐᕕᑦᑎᓐᓄᑦ ᖃᐅᔨᓇᓱᖃᑦᑕᕆᐊᒃᓴᖅ.