Representative for Children and Youth releases 2020-2021 annual report


ᐱᕙᓪᓕᐊᔪᑦ ᓴᖅᑭᑕᑦ
ᓄᕕᐱᕆ 23, 2021

ᑭᒡᒐᖅᑐᐃᔨ ᓄᑕᖅᑲᓄᑦ ᒪᒃᑯᒃᑐᓄᓪᓗ 2020-2021−ᒥ ᐊᕐᕌᒍᑕᒫᖅᓯᐅᑦ ᐅᓂᒃᑳᖅ
 

ᐃᖃᓗᐃᑦ, ᓄᓇᕗᑦ − ᐊᕐᕌᓂᒐᓚᒃᑎᑐᑦ ᐅᓂᒃᑳᓕᐅᕐᓂᖅ ᐊᕐᕌᒍᑕᒫᖅᓯᐅᑎᒥᒃ, ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᑎᑎᕋᕐᕕᖓ ᐱᓇᔪᒃᑲᓐᓂᓚᐅᕋᓗᐊᖅᐳᖅ ᐃᓗᐃᑦᑐᒥᒃ ᑕᑯᔭᒃᓴᐅᓕᖅᑎᓐᓇᓱᐊᖅᖢᒍ ᒪᒃᑯᒃᑑᓪᓗᓂ ᖃᓄᐃᓐᓇᕐᒪᖔᖅ ᑭᒡᒐᖅᑐᐃᔨᖃᖅᖢᓂ ᓄᓇᕗᑦ ᒐᕙᒪᒃᑯᖏᑕ ᐱᔨᑦᑎᕋᐅᑎᒋᕙᒃᑕᖏᓐᓄᑦ.

ᑕᐃᒪ ᐅᑭᐅᖅ ᖃᓄᐃᑦᑑᓂᖏᑦ ᒪᒃᑯᑦᑐᑦ ᓄᓇᕗᒻᒥᐅᑦ ᐊᒃᓱᑦ ᑐᓴᖅᑕᐅᔭᕆᐊᓕᖕᓂᒃ ᐊᑐᐃᓐᓇᐅᓂᖅᓴᐅᓕᖅᑑᒐᓗᐊᑦ ᑎᓴᒪᓂᒃ ᐱᓕᕆᕝᕕᖕᓂ−ᐱᔨᑦᑎᖅᐸᒃᑐᑦ ᓄᑕᖅᑲᓂᒃ ᒪᒃᑯᒃᑐᓂᒡᓗ; ᑕᒪᓐᓇᑦᑕᐅᖅ ᔫᓂᐅᑎᓪᓗᒍ ᐅᓂᒃᑳᕆᐊᖃᓚᐅᖅᓯᒪᑎᓪᓗᑕ ᐅᑕᖅᑭᕙᒃᑐᑦ ᑲᑎᒪᔨᕋᓛᑦ ᐱᓕᕆᐊᖑᓯᒪᙱᑦᑐᓄᑦ ᒐᕙᒪᒃᑯᓐᓄᑦ ᐊᒻᒪ ᒐᕙᒪᒃᑯᑦ ᑮᓇᐅᔭᓕᕆᔾᔪᑎᖏᑕ ᑲᑎᒪᔨᐊᓛᖏᓐᓄᑦ, ᑖᓐᓇ ᑭᒡᒐᖅᑐᐃᔨᐅᔪᖅ, ᔩᓐ ᐸᐃᑦᔅ ᐅᖃᖅᓯᒪᔪᖅ ᐃᒪᓐᓇ “ᐃᓚᖏᑦ ᐱᓕᕆᕝᕖᑦ ᐊᓯᔾᔨᙱᑦᑎᐊᖅᑐᑦ ᑐᑭᓯᐅᒪᓂᖃᙱᓐᓂᕐᒥᓄᑦ ᖃᓄᑎᒋ ᐱᒻᒪᕆᐅᓂᖓᓂᒃ ᑐᓴᐅᒪᔭᐅᔭᕆᐊᓖᑦ ᐊᑐᐃᓐᓇᐅᔭᕆᐊᖃᖅᑎᓪᓗᒋᑦ ᐱᓗᐊᖅᑐᒥ ᖃᓄᐃᑦᑐᖃᖅᑐᕕᓂᐅᑎᓪᓗᒍ ᑲᒪᒋᔭᐅᔾᔪᑎᖏᑦ ᖃᐅᔨᔭᐅᔪᓐᓇᖃᑦᑕᕐᒪᑕ”.

“ᒐᕙᒪᒃᑯᓐᓂ ᐱᓕᕆᕝᕖᑦ ᑐᖅᑯᐃᓯᒪᑦᑎᐊᕈᓐᓇᖅᓯᔭᕆᐊᖃᕋᓗᐊᕐᒪᑕ ᖃᓄᐃᓕᐅᕈᑕᐅᔪᕕᓃᑦ ᑐᑭᓯᔭᐅᓇᓱᐊᓕᕌᖓᑕ ᑕᒻᒪᙵᙱᑦᑐᓂᒃ ᑐᓴᖃᑦᑕᕆᐊᖃᕋᓗᐊᕐᒪᑕ ᐱᔨᑦᑎᕋᐅᑏᑦ ᒥᒃᓵᓄᑦ” ᐸᐃᑦᔅ ᐅᖃᓚᐅᖅᑐᖅ. “ᐱᑕᖃᙱᒃᑳᖓᑕᓕ, ᐊᑐᐃᓐᓇᐅᙱᑉᐸᑕ ᑕᐃᒪ ᓈᒻᒪᒃᑐᓂᒃ ᐃᓱᒪᓕᐊᖑᔭᕆᐊᓕᐅᒐᓗᐊᑦ ᓄᓇᕗᒻᒥᐅᑦ ᐱᔨᑦᑎᕋᖅᑕᐅᔾᔪᑎᒃᓴᖏᑦ ᐋᖅᑭᑲᐅᑎᒋᔪᓐᓇᖃᑦᑕᙱᒻᒪᑕ, ᐱᓗᐊᖅᑐᒥ ᓄᑕᖅᑲᐃᑦ ᒪᒃᑯᒃᑐᓪᓗ ᑭᒡᒐᖅᑐᖅᑕᐅᔭᕆᐊᖃᒻᒪᕆᐊᓗᒃᑎᓪᓗᒋᑦ.”

ᑭᒡᒐᖅᑐᐃᔨᐅᔪᖅ ᑕᑯᓂᐊᕈᒪᒐᓗᐊᖅᐳᕐᓕ ᒐᕙᒪᒃᑯᓐᓂ ᐱᓕᕆᕝᕖᑦ ᐃᓕᖅᑯᓯᖅᑖᖁᔭᐅᓪᓗᑎᒃ ᐸᐸᑦᑎᔪᓐᓇᖅᓯᓂᕐᒥᒃ ᑐᓴᐅᒪᔭᐅᔭᕆᐊᓕᖕᓂᒃ ᓲᕐᓗ ᐊᕐᕌᒍᑕᒫᖅᓯᐅᑎᒦᑦᑐᐃᑦ ᐃᓗᖏᑕ ᐊᔾᔨᖏᓐᓂᒃ ᐱᐅᓯᒋᐊᕈᑕᐅᔪᓐᓇᕐᓂᐊᕐᒪᑕ ᐱᔨᑦᑎᕋᐅᑎᓄᑦ ᓄᓇᕗᑦ ᒐᕙᒪᒃᑯᖏᑕ ᒪᒃᑯᒃᑐᖁᑎᒥᓄᑦ ᐱᔨᑦᑎᕋᐅᑎᒋᕙᒃᑕᖏᓐᓂᒃ.

ᓄᑖᑦ ᐃᓗᐊᓃᓚᐅᖅᓯᒪᙱᑦᑐᑦ ᐊᕐᕌᒍᑕᒫᖅᓯᐅᑎᒥ ᐅᑯᐊᖑᔪᑦ:

  • ᖃᓄᐃᑉᐸᓪᓕᐊᖕᒪᖔᑕ ᖃᐅᔨᒪᔾᔪᑕᐅᓂᐊᖅᑐᒥᒃ ᒐᕙᒪᒃᑯᑦ ᐱᓕᕆᕝᕕᖏᑦ ᑐᖅᑯᐃᖃᑦᑕᓕᕋᓗᐊᕐᒪᖔᑕ ᐊᑐᓕᖁᔭᐅᓚᐅᖅᓯᒪᔪᓂᒃ ᓄᑕᖅᑲᐃᑦ ᒪᒃᑯᒃᑐᓪᓗ ᑭᒡᒐᖅᑐᐃᕝᕕᖓᑕ ᑎᑎᕋᕐᕕᐊᓂ;
  • ᐊᒡᒍᖅᑐᖅᓯᒪᐅᖅᑐᒥᒃ ᑐᑭᓯᓇᖅᓯᓯᒪᓪᓗᑎᒃ ᐱᒻᒪᕆᐊᓗᖕᒥᒃ ᐋᓐᓂᖅᑐᕕᓃᑦ ᐊᒻᒪ ᐃᓅᔪᓐᓃᖅᑐᕕᓃᑦ ᓇᐃᓴᖅᑕᐅᓯᒪᓪᓗᑎᒃ, ᑖᒃᑯᐊ ᐱᒋᐊᖅᓯᒪᔪᑦ ᓯᑎᐱᕆ 30, 2015−ᒥ;  ᐊᒻᒪᓗ
  • ᓄᑕᖅᑲᐃᑦ ᒪᒃᑯᒃᑐᓪᓗ ᑭᒡᒐᖅᑐᐃᔨᖓᑦᑕ ᑎᑎᕋᕐᕕᖓᑦᑕ ᖁᕝᕙᓯᒃᑑᔭᕆᐊᖃᕐᓂᕐᒥᒃ ᒪᓕᒃᑕᐅᔭᕆᐊᓖᓪᓗ, ᑖᒃᑯᐊᓕ ᐃᓄᐃᑦ ᐃᓅᖃᑎᒌᒍᓯᖏᓐᓂᒃ ᒪᓕᒃᑑᓪᓗᑎᒃ ᑭᒡᒐᖅᑐᐃᔾᔪᓯᐅᓕᖅᑐᑦ.

ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᑎᑎᕋᕐᕕᐊᑕ 2020-2021 ᐊᕐᕌᒍᑕᒫᖅᓯᐅᑎᒧᑦ ᐅᓂᒃᑳᖓ ᓴᖅᑭᑕᐅᓚᐅᖅᓯᒪᔪᑦ ᒪᓕᒐᓕᐅᕐᕕᖕᒥᑦ ᓄᕕᐱᕆ 19, 2021-ᒥᑦ.

###

ᑐᑭᓯᒋᐊᒃᑲᓂᕈᒪᒍᕕᑦ:
ᑭᒻ ᕚᔅᑐ
ᐊᐅᓚᑦᑎᔨ ᑐᓴᐅᒪᔪᓕᕆᓂᖕᓄᑦ ᑭᒃᑯᓕᒫᓄᓪᓗ ᐅᔾᔨᖅᓱᐃᑎᑦᑎᓂᖕᒧᑦ
ᓄᑕᖅᑲᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᖅᑎᑦ ᑎᑎᕋᕐᕕᖓ
867-975-5091  |  kfoster@rcynu.ca