ᓈᓐᓯ, ᖃᓄᐃᓕᐅᖅᑕᐅᕙᓪᓕᐊᔪᓂᒃ ᖃᐅᔨᓴᖅᑎᒋᔭᕗᑦ ᐊᒻᒪᓗ ᐅᑎᐅᓪ, ᐊᐅᓚᑦᑎᔨᒋᔭᕗᑦ ᑐᓴᐅᒪᑎᑦᑎᕙᖕᓂᕐᒧᑦ, ᐅᑎᓵᑦᑎᐊᓚᐅᖅᐳᒃ ᑲᑎᒪᖃᑎᖃᕐᓂᕆᓚᐅᖅᑕᒥᓂᒃ ᒪᒃᑯᒃᑐᓂᒃ ᐱᓕᕆᑎᑦᑎᔨᒋᔭᐅᕙᒃᑐᓂᒡᓗ ᐃᒡᓗᓕᒑᕐᔪᖕᒥᐅᓂ ᑲᖏᖅᖠᓂᕐᒥᐅᓂᓗ. ᐃᒪᓐᓇ ᓈᓐᓯ ᐅᖃᐅᓯᖃᓚᐅᖅᑐᖅ ᑕᒪᑐᒧᖓ ᑕᐃᒃᑯᖕᓄᙵ ᓄᓇᓕᖕᓄᙵᐅᓂᕆᓚᐅᖅᑕᒥᖕᓄᑦ:
“ᑭᕙᓪᓕᕐᒧᙵᐅᓂᕆᔭᕗᒃ ᐊᓕᐊᓇᐃᑦᑐᒻᒪᕆᐅᓚᐅᖅᑐᖅ ᐅᕙᑦᑎᓐᓂᒡᓗ ᐱᕕᖃᖅᑎᑦᑎᓪᓗᓂ ᑲᑎᖃᑎᖃᕈᓐᓇᕐᓂᕐᒥᒃ ᐊᓕᐊᓇᐃᑦᑎᐊᖅᑐᓂᒃ ᐃᓄᖕᓂᒃ. ᐃᒡᓗᓕᒑᕐᔪᖕᒦᓐᓂᑦᑎᓐᓂ, ᑲᑎᖃᑎᖃᓚᐅᖅᐳᒍᒃ ᐃᖅᑲᓇᐃᔭᖅᑎᓂᒃ ᐃᓕᓐᓂᐊᖅᑎᓂᒡᓗ ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖕᒥ. ᑲᑎᖃᑎᖃᓚᐅᕐᒥᔪᒍᒃ ᐃᓐᓇᕆᔭᐅᔪᒥᑦ ᑖᔅᓱᒪᓕ ᐃᓚᖓᒍᑦ ᑐᑭᖃᑦᑎᐊᖅᑐᒥᒃ ᖃᐅᔨᑎᑉᐹᓪᓕᓚᐅᖅᖢᓂᑎᒍᑦ ᓄᑕᖅᑲᓄᑦ ᒪᒃᑯᒃᑐᓄᓪᓗ ᐃᒡᓗᓕᒑᕐᔪᖕᒥᐅᑕᓄᑦ. ᐱᕕᒃᓴᖃᖅᑎᑕᐅᓚᐅᕐᒥᔪᒍᑦ ᑕᑯᔭᖅᑐᕈᓐᓇᖅᑎᑕᐅᓪᓗᑕ ᐆᒥᖓ, ᓇᔭ ᐃᓴᐱᐅᓪ ᐊᖏᕐᕋᕆᔭᐅᕙᒃᑐᒥᒃ ᑲᑎᖃᑎᖃᕈᓐᓇᖅᖢᑕᓗ ᖃᔅᓯᑲᓪᓛᕐᔪᖕᓂᒃ ᐊᓯᖏᓐᓂᒃ ᐱᔨᑦᑎᕋᕐᕕᖃᕐᓂᕐᒧᑦ ᐱᑎᑦᑎᕙᒃᑐᓂᒃ. ᐱᙳᐊᖃᑕᐅᓚᐅᖅᑐᖓ ᐊᖅᓴᒧᑦ ᕼᐋᑭᙳᐊᖃᑕᐅᓪᓗᖓ ᐃᖃᐃᓕᓴᕐᕕᖕᒥ ᐅᓐᓄᒃᑯᑦ ᐅᑎᐅᓪ ᐱᓕᕆᖃᑎᖃᖅᑎᓪᓗᒍ ᐊᕐᓇᑯᓗᖕᓂᒃ ᑖᒃᑯᐊᓗ ᓈᓴᐅᓯᕆᓂᕐᒧᑦ ᑖᔅᓱᒥᖓ ᖃᐅᔨᓴᖃᑎᖃᓚᐅᖅᖢᑎ ᖃᓄᖅ ᐊᔪᙱᑎᒋᖕᒪᖔᑦ! ᑖᓐᓇ ᑕᐃᑯᙵᐅᓂᕆᔭᕗᒃ ᐊᓕᐊᓇᐃᑦᑐᒻᒪᕆᐅᓚᐅᖅᑐᖅ.
ᖃᔅᓰᖅᖢᑕ ᐊᐅᓪᓚᙱᐊᓪᓚᓚᐅᖅᖢᑕ ᓯᓚ ᐱᔾᔪᑎᒋᓪᓗᒍ, ᑲᖏᖅᖠᓂᕐᒧᙵᐅᓕᓚᐅᖅᐳᒍᑦ. ᑕᐃᑲᓃᓐᓂᑦᑎᓐᓂᓗ, ᑕᑯᔭᖅᑐᓚᐅᖅᐳᒍᑦ ᖃᔅᓯᑲᓪᓛᕐᔪᖕᓂᒃ ᐱᔨᑦᑎᕋᖅᑎᒋᔭᐅᕙᒃᑐᓂᒃ ᑐᓴᕐᕕᒋᔪᒪᓪᓗᒋᑦ ᓄᑕᖅᑲᑦ ᐱᔪᓐᓇᐅᑎᒋᔭᖏᓐᓂᒃ, ᐃᓚᖓᒍᓪᓗ ᑎᑎᕋᕐᕕᑦᑕ ᒥᒃᓵᓄᑦ ᑐᓴᖅᑎᑦᑎᔾᔪᑎᖃᕈᓐᓇᓚᐅᖅᖢᑕ ᐊᒻᒪᓗᑦᑕᐅᖅ ᖃᓄᐃᓕᐅᖃᑦᑕᕐᓂᕆᔭᑦᑎᓐᓂᒃ. ᓂᐅᕕᖅᑎᒃᑯᓐᓂᓯᐅᓚᐅᕐᒥᔪᒍᑦ ᑕᐃᑲᓂᓗ ᖃᔅᓯᐊᕐᔪᖕᓂᒃ ᓄᑕᖅᑲᓂᒃ ᐊᖓᔪᖅᑳᖏᓐᓂᒡᓗ ᑕᑯᓚᐅᖅᖢᑕ. ᑲᖏᖅᖠᓂᕐᒦᓐᓂᕆᔭᕗᑦ ᕿᓚᒻᒥᐅᓚᐅᖅᑑᒐᓗᐊᖅ ᑭᓯᐊᓂ ᖁᕕᐊᓇᓚᐅᖅᐳᖅ ᑕᑯᓪᓗᓂ ᖃᐅᔨᔪᒪᓂᕆᔭᐅᓪᓚᑦᑖᖅᑐᓂᒃ ᖃᐅᔨᒪᓕᕐᓂᑦᑎᓐᓄᑦ ᖃᓄᐃᓕᐅᕈᓐᓇᕋᔭᕆᐊᒃᓴᑦᑎᓐᓂᒃ ᐃᑲᔪᖅᑐᐃᓂᐊᕐᓗᑕ ᓄᑕᖅᑲᓂᒃ ᒪᒃᑯᒃᑐᓂᒡᓗ.”
ᐅᕙᑦᑎᓐᓄᑦ ᐳᓛᕈᓐᓇᖅᑐᓯ
ᐃᓄᐃᑦ ᐱᓕᕆᕝᕕᑦᑎᓐᓄᐊᖅᑐᑦ ᑐᙵᓱᒃᑎᑦᑎᐊᓲᕗᑦ ᑎᑎᕋᕐᕕᑦᑎᓐᓂ. ᖃᐃᓚᐅᙱᓐᓂᔅᓯᓐᓂ ᐅᖃᓗᒃᐸᒌᖃᑦᑕᕐᓂᐊᖅᐳᓯ ᐃᓂᒃᓴᓕᐅᕐᓗᓯ.
ᖃᒧᑏᒃ ᐃᒡᓗᕐᔪᐊᖅ ᐱᖓᔪᖓ ᓇᑎᐊ
ᑎᑎᖅᑲᒃᑯᕕᐊ 488 ᐃᖃᓗᐃᑦ,
ᓄᓇᕗᑦ X0A 0H0
ᑐᐊᕕᕐᓇᖅᑐᖃᕐᓂᖅᐸᑦ ᖃᐅᔨᒋᐊᕐᕕᒃᓴᑦ
ᐃᒃᐱᒍᓱᑐᐊᕈᕕᑦ ᑐᐊᕕᕐᓇᖅᑐᒃᑯᑦ ᑕᑯᔭᐅᔭᕆᐊᖃᕋᓱᒋᓗᑎᑦ ᓄᑕᖅᑲᒥᒡᓘᓐᓃᑦ, ᐅᖃᓘᑎᑦ ᓈᓴᐅᑎᖏᑦ ᑎᑎᕋᖅᓯᒪᔪᑦ ᓇᓕᐊᖕᓄᑐᐃᓐᓇᖅ ᐅᖃᓗᒡᕕᒋᖃᑦᑕᖁᔪᑦ ᐃᕐᖐᓐᓇᖅ.